चालत्या कारवर दरड कोसळून महिलेचा मृत्यू

रायगड : रायगडमध्ये चालत्या कारवर दरड कोसळून दरडीचा दगड थेट कारवर पडल्याने महिलेचा मृत्यू झाल्याची घटना गुरूवारी घडली आहे. ही घटना ताम्हिणी घाट परिसरात घडली आहे. अवकाळी पावसामुळे डोंगरकड्यावरून छोटे-मोठे दगड कोसळत आहेत. याच दरम्यान पुण्याहून माणगावकडे जाणार्‍या कारवर डोंगरावरून कोसळलेला दगड थेट कारच्या सनरूफमधून आत घुसला आणि डोक्याला गंभीर दुखापत झाल्याने महिलेचा जागीच मृत्यू झाला. मृत महिलेचे नाव स्नेहल गुजराती असे असून, त्यांचे पती आणि मुलगा किरकोळ जखमी झाले आहेत. मिळालेल्या माहितीनुसार, गुरूवारी सकाळी स्नेहल गुजराती आपल्या कुटुंबासह पुणे-रायगड जोडणार्‍या ताम्हिणी घाटातून प्रवास करत होत्या.