राजकारणात कधीही पूर्णविराम नसतो : पंतप्रधान मोदी; राज्यसभेतील 37 सदस्यांच्या निवृत्तीच्या निरोप सत्रात प्रतिपादन

नवी दिल्ली : राज्यसभेतील 37 सदस्यांच्या निवृत्तीच्या पार्श्‍वभूमीवर आयोजित निरोप सत्रात पंतप्रधान नरेंद्र मोदी यांनी संसदीय लोकशाहीच्या सातत्यावर भर देत राजकारणात पूर्णविराम नसतो असे स्पष्टपणे सांगितले. निवृत्त होणार्‍या सदस्यांच्या कार्याचा गौरव करताना त्यांनी त्यांच्या योगदानामुळे लोकशाही अधिक भक्कम झाल्याचे नमूद केले.
पंतप्रधानांनी आपल्या भाषणात संसद ही केवळ कायदे करणारी संस्था नसून सतत शिकण्याचे व्यासपीठ असल्याचे सांगितले. नव्याने निवडून आलेल्या प्रतिनिधींनी येथे येणार्‍या विविध अनुभवांतून शिकत राहणे आवश्यक असल्याचे त्यांनी अधोरेखित केले. सभागृहातील चर्चा, मतभेद आणि विचारांची देवाणघेवाण ही लोकशाहीची खरी ताकद असल्याचे ते म्हणाले. कधी मतभिन्नता असली तरी निरोपाच्या क्षणी सर्व सदस्य पक्षीय सीमांपलीकडे जाऊन एकत्र येतात, ही संसदीय संस्कृतीची वैशिष्ट्यपूर्ण बाब असल्याचे त्यांनी नमूद केले. निवृत्त होत असलेल्या सदस्यांच्या पुढील वाटचालीबाबत बोलताना पंतप्रधानांनी सांगितले की काहीजण पुन्हा सभागृहात परततील, तर काही जण सामाजिक क्षेत्रात आपल्या अनुभवाचा उपयोग करतील. जे सदस्य पुन्हा संसदेचा भाग होणार नाहीत, त्यांचे योगदान मात्र समाज आणि राष्ट्रासाठी तितकेच महत्त्वाचे राहील, असे त्यांनी स्पष्ट केले. सार्वजनिक जीवनात सक्रियतेचा प्रवास अखंड चालूच राहतो, यावर त्यांनी भर दिला. यावेळी त्यांनी ज्येष्ठ नेते एच. डी. देवगौडा, मल्लिकार्जुन खरगे आणि शरद पवार यांच्या संसदीय योगदानाचे विशेष कौतुक केले. या नेत्यांनी दीर्घकाळ लोकसेवेसाठी स्वतःला समर्पित केले असून नव्या पिढीने त्यांच्या कार्यातून प्रेरणा घ्यावी, असे त्यांनी सांगितले. तसेच राज्यसभेचे उपसभापती हरिवंश नारायण सिंह यांच्या कामकाजाचेही त्यांनी कौतुक केले. सभागृहाचे काम शांत, संयमी आणि संतुलित पद्धतीने पार पाडण्यात त्यांनी महत्त्वाची भूमिका बजावल्याचे पंतप्रधानांनी नमूद केले. भाषणाच्या शेवटी पंतप्रधानांनी संसदेची प्रतिष्ठा जपण्याचे आणि परस्पर सन्मानाचे महत्त्व अधोरेखित केले. अनुभवी नेत्यांचे मार्गदर्शन आणि नव्या सदस्यांची ऊर्जा यांचा समन्वय साधल्यास लोकशाही अधिक सक्षम होईल, असा विश्‍वास त्यांनी व्यक्त केला.