रात्रीच नंबर लावायला निघाले, काळाने डाव साधला, शेतकऱ्याचा अपघाती मृत्यू

नाशिक प्रतिनिधीं – जिल्ह्यात अपघातांचे सत्र वाढले असून नांदगाव तालुक्यात आणखी एक दुर्दैवी अपघात झाला. यामध्ये शेतकऱ्याला जीव गमावा लागला आहे. नांदगाव तालुक्यातील शेतकरी कांदा विक्रीसाठी बाजार समितीत घेऊन जाणाऱ्या एका शेतकऱ्याच्या ट्रॅक्टरला पिक अप वाहनाने धडक दिल्याने शेतकऱ्याचा जागीच मृत्यू झाल्याची दुर्दैवी घटना घडली आहे. नांदगाव तालुक्यातील चाळीसगाव – नांदगाव रस्त्यावरील जळगाव खुर्द गावाजवळ मध्यरात्री हा अपघात घडला असून एकनाथ सोनवणे असे अपघातात मृत्यू झालेल्या शेतकऱ्याचे नाव आहे.

याबाबत मिळालेली अधिक माहिती अशी की , मयत एकनाथ सोनवणे हे हिंगणे–देहेरे येथून नांदगाव बाजार समितीत कांदा विक्रीसाठी घेऊन जात होते. यावेळी जळगाव खुर्द येथे चाळीसगावकडून येणाऱ्या मालवाहू पिकअपने पाठीमागून जोरदार धडक दिली. यात शेतकरी सोनवणे याचा जागीच दुर्दैवी मृत्यू झाला.

गेल्या काही दिवसांपासून कांदा उत्पादक शेतकरी हा अगोदरच कांद्याला भाव मिळत नसल्याने हवालदिल झाला होता. त्यानंतर जिल्ह्यात अवकाळी पावसाने थैमान घातले होते. त्यात आता कुठे दिलासा मिळत असतानाच तालुक्यातील शेतकऱ्याचा कांदा विक्रीसाठी घेऊन जात असताना अपघातात दुर्दैवी मृत्यू झाला आहे. या घटनेमुळे सर्वत्र हळहळ व्यक्त केली जात आहे

दरम्यान कांदा उत्पादक शेतकरी कांदा विकला जावा यासाठी रात्रीच बाजार समितीत नंबर लावण्यासाठी जात असतात. कांदा विकून दोन पैसे मिळावे यासाठी शेतकऱ्यांची सध्या धडपड सुरू असते. या धडपडीतच शेतकऱ्याचा मृत्यू झाला. या प्रकरणी अज्ञात पिकअप वाहन चालका विरोधात नांदगाव पोलिसात गुन्हा दाखल करण्यात आल्याची माहिती मिळाली आहे.

कांदा विक्री करून दोन पैसे मिळतील अशा अपेक्षेने रात्री कांदा विक्रीसाठी गेलेल्या शेतकऱ्याला बाजार समितीत पोहोचण्या अगोदरच मृत्यूने गाठले आणि काही क्षणातच होत्याचं नव्हतं झालं. मागच्या दिशेने भरधाव वेगात येणाऱ्या पिकपच्या धडकेत शेतकऱ्याचा मृत्यू झालाय या अपघातात विक्रीसाठी घेऊन जात असलेला कांदा देखील रस्त्यात सर्वत्र खाली पडून पसरला आणि शेतकऱ्याच्या ट्रॅक्टरचे देखील मोठ्या प्रमाणात नुकसान झाले