विधानसभेचे आजपासून विशेष अधिवेशन

मुंबई : महायुती सरकारचा शपथविधी पार पडल्यानंतर शनिवारपासून विधानसभेचे विशेष अधिवेशनाला सुरूवात होणार आहे. मात्र तत्पूर्वी शुक्रवारी भाजप नेते आणि ज्येष्ठ आमदार कालिदास कोळंबकर यांना विधानसभेचे हंगामी अध्यक्षपद देण्यात आले आहे. कालिदास कोळंबकर यांनी राजभवनात विधानमंडळाच्या विशेष अधिवेशनासाठी हंगामी अध्यक्ष म्हणून शपथ घेतली. राजभवन येथे शुक्रवारी हंगामी अध्यक्षांचा शपथविधी सोहळा संपन्न झाला. त्यामुळे, विधिमंडळाच्या विशेष अधिवेशन काळात त्यांच्या अध्यक्षतेखाली विधानसभेचे कामकाज होणार आहे.
हंगामी सभापती झाल्यानंतर कोळंबकर 288 नवनिर्वाचित आमदारांना शपथ देतील. तसेच 9 डिसेंबर रोजी 15 व्या विधानसभेच्या अध्यक्षपदाची निवडणूक होणार आहे. यानंतर मुख्यमंत्री फडणवीस यांच्या नेतृत्वाखालील महाआघाडी सरकार विश्‍वासदर्शक ठराव जिंकेल. कालिदास कोळंबकर हे यंदाच्या निवडणुकीत मुंबईतील वडाळा मतदारसंघातून भाजपच्या चिन्हावर विजयी झाले आहेत. विशेष म्हणजे सगल 9 वेळा आमदार होण्याचा विक्रम त्यांनी स्वत:च्या नावावर केला. सन 1990 पासून 2004 पर्यंत त्यांनी शिवसेनेतून विधानसभा निवडणूक लढवली होती. मात्र, 2005 मध्ये माजी मुख्यमंत्री नारायण राणे यांच्यासह त्यानीही शिवसेनेला जय महाराष्ट्र करत काँग्रेसमध्ये प्रवेश केला.

9 डिसेंबरला होणार नव्या अध्यक्षाची निवड
सर्वात ज्येष्ठ आमदार म्हणून भाजपच्या कालिदास कोळंबकर हंगामी विधानसभा अध्यक्ष पद भूषवणार आहेत. पुढील तीन दिवसीय अधिवेशनात कोळंबकरांकडे हंगामी अध्यक्ष पदाची जबाबदारी राहील. पहिल्या दोन दिवसांत नवनिर्वाचित आमदारांना ते शपथ देतील. 9 डिसेंबरला नव्या अध्यक्षाची निवड होईल. आमदारांच्या बहुमताने विधानसभा अध्यक्षांची निवड करण्यात येईल.