सातारा पालिकेच्या पॉवर हाऊस येथे 20 मेगावॅटच्या वीज निर्मिती उपकेंद्रास मंजूरी

खा. उदयनराजे भोसले यांच्या प्रयत्नातून महावितरणकडून 5 कोटीचा निधी
सातारा / प्रतिनिधी : खासदार उदयनराजे भोसले यांच्या विशेष प्रयत्नातून सातारा नगरपालिकेच्या पॉवर हाऊस येथील जागेमध्ये 20 मेगावॅटची विज निर्मितीचे उपकेंद्र मंजूर करण्यात आले आहे. या प्रकल्पासाठी महावितरणच्या माध्यमातून 5 कोटी रूपये उपलब्ध करून देण्यात आले आहे. या कामाची लवकरच सुरूवात होणार असून या उपकेंद्रामुळे सातारा शहर आणि लगतचा ग्रामीण परीसर लोड शेडिंग मुक्त होणार आहे.
खा. उदयनराजे भोसले यांनी सातारा शहराच्या विकासासाठी धोरणात्मक पाऊले उचलण्याचे संकेत इनोवेटीव्ह सातारा या माध्यमातून दिले होते. या प्रकल्पाची प्रत्यक्ष अमंलबजावणी आता सुरू झाली आहे. सातारा शहर आणि लगतच्या ग्रामीण भागातील लोड शेडींगची समस्या सोडवण्यासाठी खा. उदयनराजे भोसले यांनी महावितरण विभागाकडे पत्रव्यवहार केला होता. या प्रयत्नामुळे महावितरणने सातारा शहर आणि ग्रामीण भागासाठी 20 मेगावॅटचे विज निर्मिती करणारे उपकेंद्र मंजूर केले आहे. या प्रकल्पासाठी लागणारा 5 कोटी रूपयांचा निधी खा. उदयनराजे भोसले यांच्या विशेष प्रयत्नामुळे झाला आहे. सातारा नगरपालिकेच्या मालकीचे यवतेश्‍वर घाट परिसरात पॉवर हाऊस जलशुध्दीकरण आहे. येथे विज निर्मितीचे छोटेखानी युनिट चालवले जात होते. या परिसरात 20 मेगा वॅट उपकेंद्रासाठी 15 गुंठे जागा देण्याचे धोरण निश्‍चित करण्यात आले आहे. या उपकेंद्राच्या निर्मितीमुळे सातारा शहर आणि परिसर येथील पुढील 25 वर्षासाठी विजेची समस्या सुटणार आहे.
कण्हेर पाणीपुरवठा योजना व कास पाणीपुरवठा व तत्सम कारणासाठी जी वीज, शेंद्रे एक्सप्रेस फिडरकडून घ्यावी लागते. त्याचा सर्वोत्तम पर्याय या निर्मिती उपकेंद्रामुळे होणार आहे. विविध पाणी उपसा योजनांना सुध्दा येथून वीज कनेक्शन देणे शक्य होणार आहे. महावितरण व सातारा नगरपालिका यांची समन्वयातून हा प्रकल्प उभारला जात आहे. या प्रकल्पाचा सातारा शहरासाठी आणि शहर ग्रामिण भागातील लघुउद्योगांसाठी विशेषत्वाने फायदा होणार आहे. एकीकडे लोड शेडींगमुळे सातारा औद्योगिक वसाहतीचे नुकसान होत आहे. मात्र, 20 मेगा वॅटच्या वीज निर्मिती उपकेंद्रामुळे शहरात छोट्या लघुउद्योगांना मोठा वाव मिळणार आहे.

या सदंर्भात बोलताना खा. उदयनराजे भोसले म्हणाले, सातार्‍याचा रचनात्मक विकास हे सातारा विकास आखाडीचे मुख्य धोरण राहीले आहे. कास धरणाच्या उंची प्रकल्पानंतर 20 मेगावॅट उपकेंंद्र मंजूर करून देणे हे आमचे उद्दीष्ट होते. या प्रकल्पात महावितरण विभागाने सकारात्मक प्रतिसाद दिल्यामुळे हे शक्य झाले आहे. सातार्‍यात कोणत्याही मुलभुत आणि पायाभुत सुविधांची कमतरता भासरणार नाही, या करीता आम्ही वचन बध्द आहोत. त्या दृष्टीने विविध विकास कामांचा पाठपुरावा करण्यात येत आहे.