रत्नदीप संस्थेस एम.फार्मसी अभ्यासक्रम सुरु करण्यास मंजुरी

जामखेड/प्रतिनिधी ःरत्नदीप मेडिकल फौंडेशन अ‍ॅन्ड रिसर्च सेंटर रत्नापूर-जामखेड या संस्थेस एम.फार्मसी हा पदव्युत्तर अभ्यासक्रम पाच विषयांत सुरू करण्यास फार्मसी कौन्सिल ऑफ इंडिया नवी दिल्ली व तंत्र व उच्च शिक्षण विभाग महाराष्ट्र शासन मुंबई यांनी शैक्षणिक वर्ष 2023-24 पासून सुरू करण्यास मंजुरी दिली असुन, त्याची प्रवेश प्रक्रिया सुरू झाली आहे. ही माहिती संस्थेचे अध्यक्ष डॉ.भास्कर मोरे पाटील व सेक्रेटरी डॉ.वर्षा मोरे पाटील यांनी दिली.

व्यावसायिक शिक्षणाच्या माध्यमातून नोकरी व उद्योग क्षेत्रातील शाश्‍वत संधीमुळे विद्यार्थी व पालक यांचा व्यावसायिक शिक्षणाकडे वाढता कल पाहता या संस्थेच्या रत्नदीप शैक्षणिक संकुलात आयुर्वेद, होमिओपॅथी, फार्मसी व नर्सिंग कॉलेजच्या माध्यमातून विविध व्यावसायिक शिक्षणाच्या संधी उपलब्ध करून देण्यात आल्या आहेत. जामखेड-कर्जतरोड लगत जामखेड शहरापासून दोन किलोमीटर अंतरावर वीस एकर जमिन क्षेत्रावर दिल्ली येथिल नामांकित आर्किटेक्चर यांनी डिझाईन केलेल्या सुसज्जित व अत्याधुनिक भव्य अशा सर्व सोयीसुविधांनी युक्त इमारतीत राज्याच्या विविध जिल्ह्यातील दीड हजार विद्यार्थी-विद्यार्थीनी विविध अभ्यासक्रमाचे शिक्षण घेत आहेत. रत्नदीप फार्मसी कॉलेज रत्नापूर, ता.जामखेड,जिल्हा अहमदनगरचा सांकेतिक क्रमांक 5465 व 5489 हे आहेत. शासनाच्या राज्य सामाईक प्रवेश परीक्षा कक्ष मुंबई यांच्यामार्फत चालु शैक्षणिक वर्षासाठी प्रवेश प्रक्रिया सुरू झाली आहे. अशी माहिती प्रवेश समन्वयक रविंद्र ढवळे व प्रशांत राळेभात यांनी दिली आहे.