पुलवामाच्या शहीद जवानांना अभिवादन

पंतप्रधान मोदींसह, मुख्यमंत्र्यांनी व्यक्त केल्या भावना
नवी दिल्ली ः 14 फेब्रुवारी 2019 हा दिवस देशाच्या सामूहिक स्मृतीत वेदना, संताप आणि अभिमान या तिन्ही भावनांनी कोरला गेला आहे. जम्मूहून श्रीनगरकडे निघालेल्या केंद्रीय राखीव पोलीस दलाच्या ताफ्यावर पुलवामाजवळ आत्मघाती हल्ला झाला आणि 40 जवानांनी मातृभूमीसाठी प्राणांची आहुती दिली. दरवर्षी 14 फेब्रुवारीला पुलवामातील शहीद जवानांच्या स्मृतींना देशभरातून अभिवादन केले जाते. यंदाही विविध मान्यवरांनी आपल्या भावना व्यक्त केल्या. पंतप्रधान नरेंद्र मोदी यांनी सामाजिक माध्यमांद्वारे शूर जवानांच्या त्यागाचे स्मरण करत, त्यांच्या धैर्य आणि निष्ठेमुळेच देश सुरक्षित असल्याचे नमूद केले. प्रत्येक भारतीय त्यांच्या साहसातून प्रेरणा घेतो, असे ते म्हणाले.
उपराष्ट्रपती सी.पी. राधाकृष्णन यांनीही शहीद जवानांच्या सर्वोच्च बलिदानाचा गौरव करत, त्यांची स्मृती देशाला अधिक सक्षम आणि सुरक्षित भारत घडविण्याची प्रेरणा देत राहील, असे सांगितले. केंद्रीय गृहमंत्री अमित शाह, संरक्षण मंत्री राजनाथ सिंह तसेच महाराष्ट्राचे मुख्यमंत्री देवेंद्र फडणवीस यांनीही श्रद्धांजली अर्पण करत जवानांच्या कुटुंबीयांप्रती कृतज्ञता व्यक्त केली. पुलवामाचा हल्ला हा केवळ एका दिवसाची घटना नाही; तो देशाच्या सुरक्षा व्यवस्थेचा आणि दहशतवादविरोधी धोरणाचा महत्त्वाचा टप्पा ठरला. या घटनेनंतर गुप्तचर समन्वय, ताफ्यांच्या हालचालीतील सुरक्षा उपाय, तसेच दहशतवाद्यांच्या नेटवर्कविरोधातील कारवाया अधिक बळकट करण्यात आल्या. देशांतर्गत सुरक्षा संरचनेत बदल घडवून आणण्याची गरज प्रकर्षाने अधोरेखित झाली. मात्र, या सगळ्याच्या पलीकडे पुलवामा आपल्याला एक मूलभूत सत्य आठवण करून देतो-देशाची सीमा, अंतर्गत सुरक्षा आणि शांतता या गोष्टी सैनिकांच्या आणि सुरक्षा दलांच्या त्यागावर उभ्या आहेत. ते आपले कुटुंब, सुखसोयी आणि वैयक्तिक आयुष्य बाजूला ठेवून कठीण परिस्थितीत कार्यरत असतात. त्यांचे बलिदान ही केवळ आकडेवारी नसून, प्रत्येकाच्या मागे एक कुटुंब, एक स्वप्न आणि एक अपूर्ण आयुष्य दडलेले आहे. आज पुलवामाच्या स्मृतींना उजाळा देताना, आपण केवळ श्रद्धांजली अर्पण करून थांबता कामा नये. देशात शांतता, ऐक्य आणि बंधुता जपणे हीदेखील त्या शहीदांना खरी मानवंदना ठरेल.