कोलकाता बलात्कार-हत्येची सर्वोच्च दखल

नवी दिल्ली ः कोलकाता येथील आर. जी. कार वैद्यकीय महाविद्यालयातील 31 वर्षीय निवासी डॉक्टरवर झालेला बलात्कार आणि त्यानंतर तिच्या हत्येच्या घटनेने देशभरात खळबळ उडाली आहे. या प्रकरणी आरोपींवर कठोर कारवाईंसाठी गेल्या आठ दिवसांपासून कोलकातामध्ये निवासी डॉक्टर आंदोलन करत असून, या प्रकरणातील आरोपींना फाशीची शिक्षा देण्याची मागणी जोर धरू लागली आहे. यासाठी देशभरात निर्देशनेही केली जात आहेत. दरम्यान, आता सर्वोच्च न्यायालयाने याप्रकरणाची दखल घेतली उद्या मंगळवारी यावर सुनावणी होणार आहे. सरन्यायाधीश डी. वाय. चंद्रचूड यांच्या अध्यक्षतेखालील खंडपीठ मंगळवारी या प्रकरणी सुनावणी करणार आहे. लोकांचा वाढता दबाव आणि राज्य सरकारच्या गैरकारभाराच्या आरोपांच्या पार्श्‍वभूमीवर सर्वोच्च न्यायालयाने हस्तक्षेप केला आहे. सीबीआय अर्थात केंद्रीय अन्वेषण विभागाकडून आधीच तपास सुरू असलेल्या या प्रकरणामुळे भारतातील वैद्यकीय व्यावसायिकांच्या, विशेषत: महिलांच्या सुरक्षिततेबद्दल गंभीर चिंता निर्माण झाली आहे. सरकारी रुग्णालयातील प्रशिक्षणार्थी डॉक्टर असलेल्या पीडितेला रुग्णालयाच्या सेमिनार हॉलमध्ये बेदम मारहाण करून तिची निर्घृण हत्या करण्यात आली. या गुन्ह्यात रुग्णालयात तैनात असलेल्या एका नागरी स्वयंसेवकाला ताब्यात घेण्यात आले आहे.

मात्र हा गुन्हा सामूहिक बलात्कार असल्याचा आरोप पीडितेचे कुटुंबीय आणि आंदोलकांनी केला असून या प्रकरणाची सखोल चौकशी करून सर्व दोषींना शिक्षा व्हावी, अशी त्यांची मागणी आहे. देशातील डॉक्टरांची सर्वात मोठी संघटना असलेल्या इंडियन मेडिकल असोसिएशन म्हणजेच आयएमएने मृत डॉक्टरला न्याय मिळावा या मागणीसाठी पुढाकार घेतला आहे. शनिवारी आयएमएने देशव्यापी संप पुकारत अत्यावश्यक नसलेल्या सर्व वैद्यकीय सेवा 24 तासांसाठी बंद ठेवल्या होत्या.
दरम्यान, सीबीआयने बलात्कार आणि हत्या प्रकरणातील आरोपी संजय रॉय याचे मानसशास्त्रीय मूल्यमापन सुरू केले आहे. दिल्लीतील सेंट्रल फॉरेन्सिक सायन्स लॅबोरेटरीतील (सीएफएसएल) मानसशास्त्रीय आणि वर्तणूक विश्‍लेषकांची एक टीम आवश्यक चाचण्या करण्यासाठी कोलकात्यात पोहोचली. आर. जी. कर रुग्णालयात ड्युटीवर असताना पदव्युत्तर प्रशिक्षणार्थी डॉक्टरवर बलात्कार करून तिची हत्या करण्यात आली. 15 ऑगस्ट रोजी पहाटे या भीषण घटनेच्या विरोधात निदर्शने सुरू असताना जमावाने रुग्णालयाच्या आवारात तोडफोड केली आणि पुरावे नष्ट करण्याचा प्रयत्न केला.

अनेक व्यक्तींसह पाच ते सात हजार लोकांच्या जमावाने आर. जी. कर रुग्णालयावर हल्ला केला, आंदोलक डॉक्टर आणि वैद्यकीय विद्यार्थ्यांवर हल्ला केला आणि आवारात तोडफोड करण्याचा प्रयत्न केला, ज्यामुळे सुरक्षा अधिकार्‍यांना जमावाला पांगवण्यास भाग पाडले.दरम्यान, 16 ऑगस्ट रोजी कोलकाता पोलिसांनी रुग्णालयाच्या आवारात जमावाने केलेल्या हिंसाचारात सहभागी असलेल्या 19 गुंडांना अटक केली होती. कोलकात्यातील पदव्युत्तर प्रशिक्षणार्थी डॉक्टरवर बलात्कार आणि हत्या प्रकरणातील आरोपी ’सिव्हिक वॉलंटियर’ संजय रॉय ची केंद्रीय अन्वेषण विभागाने (सीबीआय) रविवारी मानसशास्त्रीय चाचणी केली. कोलकात्याच्या आर. जी. कर रुग्णालयाच्या आवारातील सेमिनार हॉलमध्ये 9 ऑगस्ट रोजी महिलेचा मृतदेह सापडल्यानंतर ’सिव्हिक वॉलंटियर’ला अटक करण्यात आली आहे.

स्वतःहून घेतली न्यायालयाने दखल – पश्‍चिम बंगालमधील कोलकाता शहरामध्ये एका निवासी डॉक्टरवर बलात्कार करून तिची हत्या करण्यात आल्यानंतर देशभरात संतापाची लाट उमटतांना दिसून येत आहे. याप्रकरणी वैद्यकीय महाविद्यालयाकडून देखील अनेक बाबी लपवण्यात येत असल्याचे दिसून येत आहे. श्‍वविच्छेदन अहवालानंतर चार-पाच जणांनी बलात्कार केल्याचे दिसून येत आहे. या प्रकरणाची सर्वोच्च न्यायालयाने स्वत:हून याप्रकरणाची दखल घेतली आहे. यावर 20 ऑगस्ट रोजी सुनावणी पार पडणार आहे. ही सुनावणी सरन्यायाधीश डी.वाय. चंद्रचूड आणि न्यायमूर्ती जे.बी. पार्डीवाला आणि न्यायमूर्ती मनोज मिश्रा यांच्या खंडपीठासमोर पार पडणार असल्याची माहिती आहे.