रेन्बो स्कूलमध्ये खो-खो स्पर्धांना सुरुवात

कोपरगाव ता.प्रतिनिधी – तालुक्यातील ग्रामीण भागातील विद्यार्थ्यांसाठी दर्जेदार शिक्षणाची कवाडे खुली करणार्‍या शिक्षणमहर्षी लहानुभाऊ नागरे स्थापित रेन्बो इंटरनॅशनल स्कूलमध्ये 3, 4, 5, व 6 डिसेंबर 2022 रोजी सीबीएसईद्वारा आयोजित क्लस्टर खो-खो स्पर्धांचे आयोजन करण्यात आले असून संपूर्ण महाराष्ट्रातून जवळपास 45 खो-खो संघ या स्पर्धेत सहभागी होणार आहेत. संस्थेच्या इतिहासात अशा प्रकारच्या स्पर्धांचे प्रथमच आयोजन होत असल्याने शाळेच्या दृष्टीने नक्कीच हा एका सुवर्णपर्वाचा आरंभ असेल असे वक्तव्य प्राचार्य सुरेश शिंदे यांनी केले.
3 डिसेंबर 2022 रोजी सकाळी 11.00 वाजता रेन्बो इंटरनॅशनल स्कूलमध्ये शिर्डी साईबाबा संस्थानचे मुख्य कार्यकारी अधिकारी राहूल जाधव यांच्या हस्ते या खो-खो स्पर्धांचे उद्घाटन होणार आहे. सदर प्रसंगी विश्‍वभारती रुरल एज्युकेशन संस्थेचे अध्यक्ष – कांतीलाल आग्रवाल, उपाध्यक्ष वनिताताई नागरे, सचिव संजय नागरे, विश्‍वस्त मनोज आग्रवाल, आनंद दगडे यांचीही प्रमुख उपस्थिती असणार आहे. खो-खो हा पारंपारिक खेळ असून आपल्या भावना या खेळाशी जोडल्या गेल्या आहेत म्हणूनच पंचक्रोशीतील नागरीकांनी या वेळी प्रचंड संख्येने उपस्थित राहून  खेळाचा आनंद घ्यावा व खेळाडूंना प्रोत्साहन द्यावे असे अवाहन कार्यकारी संचालक आकाश नागरे यांनी केले व सहभागी स्पर्धक संघाना शुभेच्छा दिल्या.