पुणे विद्यापीठाच्या बनावट पदवी प्रमाणपत्राद्वारे मिळवली नोकरी

पुणे ः पुणे येथील सावित्रीबाई फुले पुणे विद्यापीठाचे बनावट प्रमाणपत्राद्वारे एकाने अनेक वर्ष बँकेत नोकरी केल्याचा धक्कादायक प्रकार उघड झाला आहे. बनावट प्रमाणपत्रावर मे 2014 मध्ये पदवी परीक्षा उत्तीर्ण झाल्याचे म्हटले आहे. शैक्षणिक वर्ष 2012, 13 आणि 14 या कालावधीतील ते गुणपत्रक आहे. या प्रकरणी पोलीस ठाण्यात तक्रार दाखल करण्यात आली आहे. विशेष म्हणजे गेल्या तीन वर्षांपासून या बनावट प्रमाणपत्राच्या आधारे एक व्यक्ती बँकेत नोकरी करत होती. शैक्षणिक क्षेत्राला या बातमीमुळे मोठा धक्का बसला आहे. बनावट पदवी प्रमाणपत्र देणारे रॅकेटच कार्यरत असण्याची शक्यता व्यक्त केली जात आहे.
पुणे येथील सावित्रीबाई फुले पुणे विद्यापीठाशी संलग्न असलेल्या दौंड येथील के. जी. कटारिया कॉलेजमधून पदवी घेतल्याचे हे प्रमाणपत्र आहे. बी.कॉम.चे हे प्रमाणपत्र असून त्या आधारे ठाणे येथील खासगी बँकेत नोकरी मिळवल्याचा प्रकार उघड झाला आहे. मागील तीन वर्षांपासून तो व्यक्ती बनावट प्रमाणपत्राच्या आधारे बँकेत कार्यरत आहे. बनावट प्रमाणपत्रावर मे 2014 मध्ये पदवी परीक्षा उत्तीर्ण झाल्याचे म्हटले आहे.

शैक्षणिक वर्ष 2012, 13 आणि 14 या कालावधीतील ते गुणपत्रक आहे. बँकेतील व्यवस्थापकाने बँकेत नोकरी करणार्‍या त्या व्यक्तीच्या कागदपत्रांची पडताळणी सुरु केली. त्यासाठी बँकेकडून चार महिन्यांपूर्वी दौंड येथील कॉलेजशी संपर्क साधला गेला होता. त्यावेळी कॉलेजमधील प्रशासनाला धक्का बसला. बँकेने जे प्रमाणपत्र पाठवले होते, ते बनावट असल्याचे निदर्शनास आले. महाविद्यालयाने विद्यापीठाच्या परीक्षा विभागाने त्या प्रमाणपत्राची पडताळणी केली. त्यात ते खोटे असल्याचे सिद्ध झाले. त्यानंतर विद्यापीठाचे उपकुलसचिव ज्ञानेश्‍वर भोसले यांनी पुण्यातील चतु:शृंगी पोलीस ठाण्यात फिर्याद दिली. त्यानुसार गुन्हा दाखल झाला आहे. या प्रकारानंतर पुणे विद्यापीठाचे बनावट प्रमाणपत्र देणारे रॅकेटच असण्याची शक्यता व्यक्त केली जात आहे. त्यासाठी बनावट संकेतस्थळ करण्यात आले आहे. ते संकेतस्थळ विद्यापीठाच्या नावाशी साधर्म्य दाखवणारे आहे. त्या माध्यमातून अनेकांची फसवणूक झाल्याची शक्यता व्यक्त केली जात आहे. आता पोलिस तपासात किती जणांना बनावट प्रमाणपत्र मिळाले, या रॅकेटमागे कोण आहे, हे समोर येणार आहे.