जामखेड तालुक्यात घरफोडी करणारी सराईत टोळी गजाआड

जामखेड : जामखेड तालुक्यात विविध ठिकाणी घरफोडी करणारी सराईत टोळी स्थानिक गुन्हे शाखेच्या पथकाने गजाआड केली. आहे. जामखेड तालुक्यातील धोत्री येथील काकासाहेब अडाले हे लग्नासाठी कुटुंबियासह बाहेरगावी गेलेले असताना बंद घराचा कडीकोयंडा तोडून कपाटातील रोख रक्कमेसह सोन्याचे दागिने असा एकूण २लाख ३० हजार रुपयांचा ऐवज चोरट्यांनी लंपास केलेला मुद्देमाल हस्तगत करण्यात आला आहे. याप्रकरणी त्यांनी जामखेड पोलीस ठाण्यात फिर्याद दिली होती.
याप्रकरणी निंबाळकर आसाराम भोसले (वय 36, रा. रुटी, ता. आष्टी, जि. बीड), आहिलाश्या जंगल्या भोसले (वय 50), कौशल्या आहिलाश्या भोसले (वय 35, दोघे रा. पांडेगव्हाण, ता. आष्टी, जि. बीड) व महादेव सुखदेव भोसले (वय 55, रा. चिखली, ता. आष्टी, जि. बीड) या चार संशयित आरोपींना जेरबंद केले. त्यांच्याकडून 10 ग्रॅमचे सोन्याचे नेकलेस, एक मोबाईल, 10 ग्रॅम सोन्याचा दागिना व एक दुचाकी असा मुद्देमाल हस्तगत करण्यात आला. रामेश्वर जंगल्या भोसले (रा. पांडेगव्हाण, ता. आष्टी, जि. बीड) हा पसार झाला आहे.पोलिसांना तांत्रीक विश्लेषणाच्या आधारे माहिती मिळाली की, या गुन्ह्यातील संशयित आरोपी निंबाळकर आसाराम भोसले (रा. आष्टी, जि. बीड) व इतर साथीदार यांनी सदरची घरफोडी केली आहे. दरम्यान, संशयित आरोपी चोरी केलेले सोने महादेव सुखदेव जाधव यांना विक्री करण्यासाठी जामखेड येथील गुगळे प्लॉटींग येथे येणार असल्याची खात्रीशीर माहिती पोलिसांना मिळाली. त्यानुसार स्थानिक गुन्हे शाखेच्या पोलीस पथकाला संशयितांना ताब्यात घेण्यात यश आले. ही कारवाई पोलीस अधीक्षक राकेश ओला, अप्पर पोलीस अधीक्षक प्रशांत खैरे, उपविभागीय पोलीस अधिकारी विवेकानंद वाखारे यांच्या मार्गदर्शनाखाली पोलीस निरीक्षक दिनेश आहेर, सपोनि हेमंत थोरात, पोलीस अंमलदार बबन मखरे, हृदय घोडके, फुरकान शेख, संतोष खैरे, भाऊसाहेब काळे, अमोल कोतकर, मेघराज कोल्हे, ज्योती शिंदे, सारिका दरेकर व उमाकांत गावडे यांच्या पथकाने केली आहे.

४ दिवसाची पोलीस कोठडी 

स्थानिक गुन्हे शाखेच्या पथकाने घरफोडी प्रकरणी पकडलेल्या एका महिलेसह चार आरोपींना पंचनामा करून जामखेड पोलिसांच्या ताब्यात दिले आहे. न्यायालयाने त्यांना ४ दिवसाची पोलीस कोठडी दिली आहे. सदर आरोपींनी जामखेडला ४,खर्डा १,कर्जत तालुक्यात १ अशा साथीदारांच्या मदतीने केलेल्या ६ गुन्ह्यांची कबुली दिली आहे. अशी माहिती अतिरिक्त महिला पोलिस उपनिरीक्षक वर्षा जाधव यांनी दिली. पुढील तपास पोलीस निरीक्षक महेश पाटील यांच्या मार्गदर्शनाखाली अतिरिक्त महिला पोलिस उपनिरीक्षक वर्षा जाधव करत आहेत