लोकसभा निवडणूक मतमोजणीसाठी निवडणूक यंत्रणा सज्ज

अहमदनगर : लोकसभा सार्वत्रिक निवडणूक 2024 च्या अनुषंगाने मंगळवार 4 जून रोजी मतमोजणी होणार आहे. 37-अहमदनगर व 38-शिर्डी लोकसभा मतदार संघासाठी मतमोजणी महाराष्ट्र राज्य वखार महामंडळ, एमआयडीसी, नागापूर, अहमदनगर येथे सकाळी 8 वाजेपासून सुरू होणार आहे. या मतमोजणीसाठी सुमारे  एक हजार पाचशे अधिकारी, कर्मचार्‍यांची नियुक्ती करण्यात आली असुन मतमोजणीसाठी सर्व निवडणूक यंत्रणा सज्ज असल्याची माहिती निवडणूक शाखेने दिली आहे.
            मतमोजणीसाठी निवडणूक शाखेने सर्व यंत्रणा सज्जता केली आहे. जिल्हा निवडणूक अधिकारी तथा जिल्हाधिकारी सिद्धाराम सालीमठ हे स्वतः सर्व व्यवस्थेवर लक्ष ठेवून आहेत. 37-अहमदनगर लोकसभा मतदारसंघाची मतमोजणी गोदाम क्र. 1 येथे तर 38-शिर्डी लोकसभा मतदारसंघाची मतमोजणी गोदाम क्र.3 मध्ये होणार आहे.

एका विधानसभा क्षेत्रासाठी 14 टेबल –
37-अहमदनगर लोकसभा मतदार संघात सहा विधानसभा क्षेत्रांचा समावेश आहे. त्यात  222-शेवगाव पाथर्डी, 223-राहुरी, 224-पारनेर, 225-अहमदनगर शहर,  226-श्रीगोंदा व 227-कर्जत जामखेड असे सह विधानसभा मतदारसंघ आहेत. तसेच 38-शिर्डी लोकसभा मतदारसंघात 216-अकोले, 217-संगमनेर, 218-शिर्डी, 219-कोपरगाव, 220-श्रीरामपुर व 221-नेवासा असे एकुण सहा विधानसभा मतदारसंघ आहेत.  प्रत्येक विधानसभा क्षेत्रातील मतांची मोजणी करण्यासाठी 14 टेबल लावण्यात आले आहेत.

मतमोजणी फेर्‍या – विधानसभा मतदार संघ निहाय असणार्‍या व मतदान केंद्रनिहाय होणार्‍या मतमोजणी फेर्‍या याप्रमाणे असतील. 38-शिर्डी लोकसभा मतदारसंघातील 216-अकोले, 307 मतदान केंद्र 22 फेर्‍या, 217-संगमनेर 278 मतदान केंद्र 20 फेर्‍या, 218-शिर्डी 270 मतदान केंद्र 20 फेर्‍या, 219-कोपरगाव 272 मतदान केंद्र 20 फेर्‍या, 220-श्रीरामपुर 311 मतदान केंद्र 23 फेर्‍या तर 221- नेवासा 270 मतदान केंद्र 20 फेर्‍या होणार आहेत. 37-अहमदनगर लोकसभा मतदारसंघातील 222-शेवगाव पाथर्डी 365 मतदान केंद्र 27 फेर्‍या, 223-राहुरी 307 मतदान केंद्र 22 फेर्‍या, 224-पारनेर 365 मतदान केंद्र 27 फेर्‍या,, 225-अहमदनगर शहर 288 मतदान केंद्र 21 फेर्‍या, 226-श्रीगोंदा 345 मतदान केंद्र 25 फेर्‍या तर 227-कर्जत जामखेड 356 मतदान केंद्र 26 फेर्‍या होणार आहेत.

सुरक्षा व्यवस्था – मतमोजणीसाठी नियुक्त प्रत्येक कर्मचारी, मतमोजणी प्रतिनिधी, निवडणूक प्रतिनिधी, उमेदवार यांना ओळखपत्र देण्यात आले आहेत. मतमोजणी केंद्राची कडक अशी सुरक्षा व्यवस्था ठेवण्यात आली आहे. संपूर्ण मतमोजणी केंद्रावर सीसीटीव्हीद्वारे निगराणी होत आहे. मतमोजणी केंद्रात मोबाईल व पेन घेऊन जाण्यास मनाई करण्यात आली आहे. या शिवाय स्वतंत्र मिडिया कक्ष स्थापन करण्यात आला असून त्याद्वारे माध्यम प्रतिनिधींपर्यंत माहिती पोहोचविली जाणार आहे.