तब्बल 12 हजार कोटींचे ड्रग्ज जप्त

कोच्ची/वृत्तसंस्था : केरळच्या कोच्चीमध्ये नार्कोटिक्स कंट्रोल ब्युरो (एनसीबी) आणि भारतीय नौदलाच्या संयुक्त कारवाईत 12 हजार कोटी रुपयांचे अंमली पदार्थ जप्त करण्यात आलेत. यावेळी मॅथॅम्फेटामाईन नावाचे ड्रग्ज देखील आढळून आलेय. भारतात पहिल्यांदाच या अंमलीपदार्थीची इतकी मोठी खेप पकडण्यात आली. याप्रकरणी एका पाकिस्तानी तस्कराला अटक करण्यात आली असून त्याने हा माल अफगाणीस्तानातून समुद्रमार्गे केरळमध्ये आणल्याची प्राथमिक माहिती आहे.
याबाबत एनसीबीच्या अधिकार्‍यांनी दिलेल्या माहितीनुसार, आतापर्यंतच्या कारवाईत सुमारे 3200 किलो मेथॅम्फेटामाइन, 500 किलो हेरॉईन आणि 529 किलो चरस जप्त करण्यात आली आहे. अफगाणिस्तानातून भारतात आणल्या जाणार्‍या अमली पदार्थांच्या विरोधात ही कारवाई सुरू करण्यात आली आहे.एनसीबी टीमने डीआरआय, एटीएस गुजरात इत्यादी संस्था आणि भारतीय नौदलाची गुप्तचर शाखा, एनटीआरओ इत्यादी गुप्तचर संस्थांशी संवाद साधला आणि माहिती गोळा केली. भारतीय नौदलाच्या गुप्तचर विभागाच्या संयुक्त प्रयत्नांतून मकरनच्या किनार्‍यावर मोठ्या प्रमाणात मेथॅम्फेटामाइन घेऊन जाणार्‍या ‘मदर शिप’च्या हालचालीबाबत गुप्तचर माहिती मिळाली. मदर शिप ही महासागरात जाणारी मोठी जहाजे आहेत, जी मोठ्या प्रमाणात अंमली पदार्थ इतर जहाजांना वितरीत करतात. ही कारवाई करण्यासाठी एनसीबी टीमने माहिती गोळा केली आणि भारतीय नौदलाला शेअर केली. आसपासच्या परिसरात भारतीय नौदलाचे जहाज तैनात करण्यात आले होते. या इनपुटच्या आधारे नौदलाने समुद्रात जाणारे एक मोठे जहाज अडवले होते. जहाजातून संशयित मेथॅम्फेटामाइनची 134 पोती जप्त करण्यात आली असून एका इराणी नागरिकालाही ताब्यात घेण्यात आले आहे. थांबलेल्या स्पीड बोटमध्ये एक व्यक्ती होता जो पाकिस्तानी नागरिक असल्याचा संशय आहे. जप्त केलेल्या गोण्या, पाकिस्तानी नागरिक, पकडलेली बोट आणि मुख्य जहाजातून जप्त केलेल्या काही इतर वस्तू 13 मे रोजी कोचीन येथील मत्तनचेरी जेट्टी येथे आणण्यात आल्या आणि पुढील कारवाईसाठी एनसीबीकडे सुपूर्द करण्यात आल्या आहेत.