नांदेडमध्ये मृत्यूचे तांडव  

नांदेड/प्रतिनिधी ः ठाणे शहरामध्ये एका रात्रीत 17 रुग्णांचा मृत्यू झाल्याची घटना ताजी असतांनाच, नांदेड जिल्हा सरकारी रुग्णालयात गेल्या 24 तासामध्ये 24 रुग्णांचा मृत्यू झाल्यामुळे खळबळ उडाली आहे. विशेष म्हणजे मृतांमध्ये 12 नवजात बालकांचाही समावेश आहे. त्याचबरोबर सर्पदंश आणि विषबाधेमुळे 12 जणांचा मृत्यू झाल्याची प्राथमिक माहिती समोर आली आहे. या घटनेमुळे एकच खळबळ उडाली आहे.
या प्रकरणी शासकीय रुग्णालयाच्या अधिष्ठातांनी सांगितले की, मृतांध्ये बाह्यरुग्णांचा अधिक समावेश आहे. या प्रकरणाची चौकशी करण्याची मागणी करण्यात येत आहे. नांदेडच्या डॉ. शंकरराव चव्हाण सरकारी रुग्णालयात हा धक्कादायक प्रकार घडला आहे. रुग्णालय प्रशासनाने सर्पदंश आणि विषबाधेमुळे 12 जणांचा मृत्यू झाला अशी प्राथमिक माहिती समोर येत आहे. रुग्णालय प्रशासनाने सांगितले की, 70 ते 82 किलोमीटर परिसरात असे मोठे रुग्णालय नाही. यामुळेदोन तीन जिल्ह्यातील रुग्ण येथे उपचारासाठी येतात. 24 तासात 24 रुग्णांचा मृत्यू झाला आहे. यात 12 नवजात बालकांचा समावेश आहे. यापैकी 6 मुले तर 6 मुली आहेत. तर, इतर 12 जण प्रौढ आहेत. यासंदर्भात अधिष्ठाता वाकोडे म्हणाले की, या रुग्णालयात प्रामुख्याने सर्पदंश झालेले रुग्ण मोठ्या संख्येने उपचारासाठी येत असतात. सर्प दंशावर उपचार करण्यासाठी मुंबईच्या हाफकिन संस्थेच्या माध्यमातून सर्पदंशावरील औषध मागवली जातात. सध्या काही प्रमाणात येथे सर्पदंशावरील औषधांची कमतरता आहे. मोठ्या संख्येने रुग्ण येथे उपचारासाठी येथे येत असल्याने रुग्णालयावर ताण असल्याचा खुलासा यांनी केला आहे. यावर्षी ऑगस्ट महिन्यात मुख्यमंत्री एकनाथ शिंदे यांच्या ठाण्यातील छत्रपती शिवाजी महाराज रुग्णालयात केवळ एकाच रात्रीत तब्बल 17 रुग्णांचा मृत्यू झाल्याची घटना घडली होती. या घटनेनंतर आरोग्य विभागावर भरपूर टीका झाली होती. या घटनेला एक महिना उलटत नाही तोच नांदेडमध्ये अशीच घटना घडल्याने खळबळ उडाली आहे.

अधिष्ठातांकडून पडदा टाकण्याचा प्रयत्न – नांदेडमधील सरकारी रुग्णालयात 24 तासांमध्ये 24 रुग्णांचा मृत्यू झाल्यानंतर याप्रकरणी चौकशी करण्याची मागणी जोर धरतांना दिसून येत आहे. तर दुसरीकडे रुग्णालयाच्या अधिष्ठातांकडून या प्रकरणी बहुतांश मृत्यू बाह्य रुग्णांचा झाल्याचा दावा करत या प्रकरणावर पडदा टाकण्याचा प्रयत्न केला जात आहे. पण आता घटनेचे गांभीर्य पाहून या प्रकरणाच्या सखोल चौकशीची मागणी होत आहे. नांदेडच्या सरकारी रुग्णालयात गत 24 तासांत 24 रुग्णांचा मृत्यू झाला आहे. यापैकी 12 जणांचा मृत्यू सर्पदंश व विषबाधेमुळे झाल्याची माहिती आहे. औषधी व मनुष्यबळाचा तुटवडा ही या मृत्यूमागील प्रमुख कारणे असल्याचा दावा केला जात आहे. या रुग्णालयात नांदेड जिल्ह्यासह लगतच्या परभणी, हिंगोली, यवतमाळ व तेलंगणा भागातील शेकडो रुग्ण येतात. त्यातच ही घटना घडल्यामुळे या भागात मोठी खळबळ माजली आहे. या प्रकरणी रुग्णालयाचे अधिष्ठाता एस आर वाकोडे यांच्याशी संपर्क साधण्याचा प्रयत्न करण्यात आला. पण त्यांनी मृतांमध्ये बाह्य रुग्णांचा सर्वाधिक समावेश असल्याचे स्पष्ट करत या प्रकरणावर पडदा टाकण्याचा प्रयत्न केला.