उजनीच्या कालव्यात ट्रॅक्टर कोसळून 5 जणांचा मृत्यू

सोलापूर/प्रतिनिधी –  पंढरपूर तालुक्यातील करकंब येथील देशमुख वस्तीच्या बाजूला असलेल्या उजनी कालव्यात ऊस तोड मजुरांना घेऊन निघालेला ट्रॅक्टर कोसळला. यात ट्रॅक्टरमध्ये बसलेले 3 महिल व 2 मुले ठार झाली. तर, अन्य 5 जण जखमी झाले आहेत. मृतांमध्ये माय-लेकाचा समावेश आहे. मंगळवारी (ता. 13) रात्री सव्वा अकरा वाजता ही दुर्घटना घडली.
अपघातग्रस्त मजूर मध्यप्रदेशातील बडवानी जिल्ह्यातील आहेत. जखमी मजुरांवर पंढरपूर आणि सोलापूर येथील रुग्णालयात उपचार सुरू आहेत. ऊस तोडणी वाहतुकीसाठी करकंब येथील दत्तात्रय मारुती वसेकर यांच्या ट्रॅक्टरसह बदया सेनानी यांची मजुरांची टोळी काम करीत आहेत. या टोळीत 17 मजूर आहेत. करकंब येथील विठ्ठलराव शिंदे सहकारी साखर कारखाना युनिट नंबर दोनसाठी 13 डिसेंबर रोजी दुपारी हे मजूर ऊस तोडणीसाठी गेले होते. काम उरकून रात्री सव्वा अकरा वाजता परत येत असताना दत्तात्रय वसेकर यांच्या घराजवळ काही मजूर उतरले आणि बाकी मजुरांना घेऊन ट्रॅक्टर पुढे निघाला. बागवान वस्तीजवळ आल्यानंतर ट्रॅक्टर ट्रॉलीसह उजनीच्या कालव्यात कोसळला. घटनेची माहिती मिळताच परिसरातील नागरिक मदतीसाठी धावले. तसेच करकंब पोलिसही तातडीने घटनास्थळी दाखल झाले. जखमींना बाहेर काढून करकंब ग्रामीण रुग्णालयात दाखल करण्यात आले. अपघातात मजूर अरविंद राजाराम कवछे (वय 2 वर्षे), प्रिया नवलसिंग आर्या (वय 1 वर्ष), सुरीका विरसिंग डावर (वय 16 वर्षे ) आणि रमकाबाई विरसिंग आर्या (वय 23 वर्षे) हे उपचारापूर्वीच मयत झाल्याचे सांगण्यात आले. तर, सोलापूरला उपचारासाठी दाखल केल्यानंतर सुनीता राजाराम कलछे (वय 23 वर्षे) ही महिला मयत झाली. सर्व मयत आणि जखमी कामगार हे मध्य प्रदेशातील बुडवाणी जिल्ह्यातील, वरला तालुक्यातील कोलकी येथील रहिवासी आहेत. घटना घडल्यानंतर ग्रामीण रुग्णालय येथे उपविभागीय पोलीस अधिकारी विक्रम कदम यांनी भेट देऊन सर्वांची विचारपूस केली. सरपंच आदिनाथ देशमुख, बागवान दत्तात्रय देशमुख वसेकर, नागा माळी आदीसह देशमुख वस्ती, वसेकर वस्ती, मदने वस्ती येथील लोक मदतीसाठी धावून आले. सुनील गंगाराम बारेला याने दिलेल्या फिर्यादीनुसार ट्रॅक्टर चालक लहू खंडू खारे याच्या विरोधात करकंब पोलीस ठाण्यात गुन्हा दाखल करण्यात आला आहे. पुढील तपास पोलीस करीत आहेत. अपघातात अरविंद राजाराम कवछे या 2 वर्षीय बालकाचा जागेवरच तर, त्याची आई सुनीता राजाराम कवछे हिचा सोलापूर येथील सिव्हिल रुग्णालयात उपचारादरम्यान मृत्यू झाला आहे. तर मुलाचे वडील राजाराम देवीसिंग कवछे हे गंभीर जखमी आहेत.