बस दरीत कोसळून 7 प्रवाशांचा मृत्यू; उत्तराखंड अल्मोडा येथील अपघात

नवी दिल्ली : उत्तराखंडमधील अल्मोडा जिल्ह्यात एक प्रवासी बस खोल दरीत कोसळून अपघात झाला आहे.या अपघातात सात जणांचा मृत्यू झाल्याची माहिती आहे. अनेक प्रवासी जखमी झाले आहेत. घटनेची माहिती मिळताच पोलीस आणि प्रशासनाची पथके घटनास्थळी दाखल झाली असून, बचावकार्य सुरू करण्यात आले आहे.
मिळालेल्या माहितीनुसार, अपघातग्रस्त बस रामनगरकडे जात होती. सैलापानीजवळ अचानक बस चालकाचे नियंत्रण सुटले आणि बस खोल दरीत कोसळली. अपघात इतका भीषण होता की घटनास्थळीच काही प्रवाशांचा मृत्यू झाला. आतापर्यंत पाच मृतदेह घटनास्थळावरून बाहेर काढण्यात आले आहेत, तर एका अन्य मृत्यूची नंतर पुष्टी झाली आहे. मृतांची ओळख आणि पत्ते शोधण्याचे काम प्रशासनाकडून सुरू आहे. बसमध्ये सुमारे 12 प्रवासी होते असे सांगण्यात येत आहे.
घटनेची माहिती मिळताच पोलीस, प्रशासन आणि आपत्ती व्यवस्थापन पथके घटनास्थळी पोहोचली. स्थानिक नागरिकांनीही मदत आणि बचावकार्यामध्ये महत्त्वाची भूमिका बजावली. पोलिसांच्या माहितीनुसार, दरी खूप खोल असल्याने बचावकार्य करताना अडचणी येत आहेत, तरीही युद्धपातळीवर रेस्क्यू ऑपरेशन सुरू आहे. जखमी प्रवाशांना प्राथमिक उपचारांसाठी जवळच्या आरोग्य केंद्रांमध्ये दाखल करण्यात आले आहे, तर गंभीर जखमींना उच्चस्तरीय वैद्यकीय केंद्रांकडे पाठवण्यात आले आहे. प्रशासनाने मृतांच्या नातेवाइकांना माहिती देण्याची प्रक्रिया सुरू केली आहे. अपघाताच्या कारणांची चौकशी सुरू असून, प्राथमिक तपासात रस्त्याची स्थिती आणि चालकाचे नियंत्रण सुटणे ही संभाव्य कारणे मानली जात आहेत. प्रशासनाने या घटनेबद्दल तीव्र दुःख व्यक्त करत सर्वतोपरी मदतीचे आश्‍वासन दिले आहे.