फायर सेफ्टीचा डबा डोक्यात घालून पुण्यात मित्राचा खून

पुणे/प्रतिनिधीः गरवारे प्रशालेच्या आवारात दारू पित बसलेल्या दोन मित्रांमध्ये झालेल्या वादातून एकाने दुसर्‍याच्या डोक्यात फायर सेफ्टीचा डबा मारून खून केल्याचा प्रकार बुधवारी सकाळी उघड झाला. मित्राचा खून केल्याचे स्वत: आरोपीने सांगितल्यानंतर या प्रकाराची माहिती पोलिसांना मिळाली. या प्रकरणी डेक्कन पोलिस ठाण्यात खुनाचा गुन्हा दाखल करून आरोपीला अटक करण्यात आली आहे. 

राजन रमेश सहानी (वय 27, रा. वारजे नाका) असे खून झालेल्या तरुणाचे नाव आहे. या प्रकरणी पोलिसांनी आरोपी किसन प्रकाश वरपा (वय 21, रा. श्रमिक वसाहत, कर्वे रोड) याला अटक केली आहे. पोलिसांनी दिलेल्या माहितीनुसार, राजन आणि किसन हे चांगले मित्र आहेत. राजन हा पेटिंगचे काम करतो, तर किसन काहीही कामधंदा करत नाही. राजन आणि किसन दोघांनाही दारू पिण्याचे व्यसन आहे. रविवारी दुपारी दोघेही दारू पिण्यासाठी अड्ड्यावर आले होते. तेथून ते सिंहगडावर गेले. तिथे ते दारू प्यायले. रात्री उशीर झाल्याने किसन हा राजनला घेऊन गरवारे शाळेत आला. किसन हा तेथे शिकला असल्याने रात्री उशीर झाल्यावर तो कंपाऊंडवरून उडी मारून येथील व्हरांड्यात झोपत असे. त्याप्रमाणे दोघेही कंपाऊंडवरून उडी मारून आत आले. दुसर्‍या मजल्यावरील व्हरांड्यात ते पुन्हा उरलेली दारू प्यायले. त्या वेळी त्यांच्यात वादावादी झाली. सध्या शाळेत रंगकाम सुरू आहे. तेथे एक फावडे पडले होते. ते राजनने किसनच्या हातावर मारले. त्यामुळे किसन याने भिंतीवरील फायर सेफ्टीचा लाल डबा काढून राजनच्या डोक्यात घातला. वर्मी घाव बसल्याने राजन जागेवरच निपचित पडला. त्यानंतर किसन याने त्याला ओढत एका क्लासरूममध्ये नेले. तेथे पुन्हा त्याला दोन तीन वेळा मारले. त्यानंतर तो सकाळ झाल्यावर घरी निघून आला. राजन घरी न आल्याने त्याच्या नातेवाइकांनी सर्वत्र शोधाशोध सुरू केली. शेवटी मंगळवारी दुपारी त्यांनी वारजे पोलिसांकडे बेपत्ता असल्याची तक्रार दिली. किसन हा बुधवारी पहाटे पुन्हा गरवारे प्रशालेत आला. त्याने कंपाऊंडवरून उडी घेऊन आत प्रवेश केला. ते बसले होते, त्या दुसर्‍या मजल्यावरील क्लासरूममध्ये गेला. त्या वेळी त्याला राजनचा मृतदेह तेथेच पडलेला दिसून आला. त्यानंतर तो थेट समोरील डेक्कन पोलिस ठाण्यात आला. त्याने स्वत: मित्राचा खून केला असून अटक करण्यास सांगितले. या प्रकारानंतर पोलिसांनी जाऊन खात्री केल्यानंतर हा खुनाचा प्रकार समोर आला आहे. या प्रकरणी डेक्कन पोलीस अधिक तपास करत आहेत.