वाघनखांसह शस्त्रास्त्र प्रदशर्नाचे आज होणार उद्घाटन  

सातारा : बहुचर्चित आणि बहुप्रतिक्षित वाघनखे गुरूवारी सातार्‍यात दाखल झाली आहेत. ही वाघनखे शिवाजी महाराजांची नसल्याचा दावा अनेक इतिहासतज्ज्ञांकडून केला जात आहे. दरम्यान गुरूवारी अत्यंत गोपनीयता पाळत ही वाघनखे सातार्‍यातील वस्तू संग्रहालयात आणण्यात आली. कोणताही गाजावाजा न करता वाघनखे तात्काळ सातार्‍याला आणण्यात आली.
लंडनहून कडेकोट सुरक्षा व्यवस्थेत वाघनखे मुंबईत आणण्यात आली आहे. वाघनखांच्या सुरक्षेसाठी प्रचंड गोपनीयता पाळण्यात येत असल्याची माहिती आहे. शिवप्रेमींसाठी शुक्रवारी वाघनखांसह शस्त्रास्त्र प्रदर्शनाचे उद्घाटन होणार आहे. पुढील तीन वर्षे शिवप्रेमींना ही वाघनखे पाहता येणार आहे. उद्घाटनावेळी मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार व सांस्कृतिक कार्य मंत्री सुधीर मुनगंटीवार यांची प्रमुख उपस्थिती असणार आहे. सोबतच, उदयनराजे भोसले, शिवेंद्रराजे भोसले आणि छत्रपती घराण्यातील इतर उपस्थित राहतील, असे समजते. छत्रपतींची ही वाघनखे पाहण्यासाठी शिवप्रेमींची मोठी गर्दी उसळण्याची दाट शक्यता आहे. छत्रपती शिवाजी महाराजांचा इतिहास अजरामर असून कित्येक पिढ्यांसाठी हा प्रेरणादायी ठेवा आहे. महाराष्ट्रातील गड-किल्ले आणि ऐतिहासिक वास्तू आजही 16 व्या शतकातील मराठ्यांच्या शौर्याची आणि किर्तीची साक्ष देत आहेत. त्यापैकीच एक असेलल्या शिवरायांच्या वाघनखांचं आज लंडनहून भारतात आगमन झालं आहे. ऐतिहासिक प्रतापगडावर अफजलखानाचा कोथळा काढलेली छत्रपती शिवाजी महाराजांची वाघनखे आता सातारा जिल्हा हद्दीत दाखल झाली आहेत. आयशर गाडीतून ही वाघनखे पोलीस बंदोबस्तात सातार्‍यात दाखल झाली. छत्रपती शिवाजी महाराजांची वाघनखे जी राज्यात आली आहे ती सध्या सातारा येथे राहतील, ही वाघनखे सातारा, कोल्हापूर, मुंबई आणि नागपूर या 4 शहरात प्रदर्शित केली जाणार असल्याचे सध्या ठरले आहे. मात्र, याचे नियोजित वेळापत्रक अजून ठरलेले नाही. मुख्यमंत्री एकनाथ शिंदें यांच्यासोबत बोलून हे वेळापत्र निश्‍चित केले जाणार असल्याची माहिती सांस्कृतिक कार्यमंत्री सुधीर मुनगंटीवार यांनी दिली.

नागरिकांना उद्यापासून पाहता येणार वाघनखे– सातार्‍यातील छत्रपती शिवाजी महाराज संग्रहालयातील प्रदर्शन शनिवारपासून (20 जुलै) नागरिकांसाठी खुले होणार आहे. पुढील 7 महिने सर्व दिवशी सकाळी 11 ते सायंकाळी 5 या वेळेत वाघनखे पाहता येणार आहेत. याची तिकिटे ऑनलाईन आणि ऑफलाईन, अशा दोन्ही पद्धतीने मिळतील. एकावेळी 200 लोकांना प्रदर्शन पाहता येईल. त्यासाठी दिवसभरात चार स्लॉट करण्यात आले आहेत. पहिला स्लॉट हा विद्यार्थ्यांसाठी मोफत आहे. दुपारी एक नंतरच्या तिन्ही स्लॉटमध्ये नागरिकांना नाममात्र शुल्कामध्ये प्रदर्शन पाहता येईल.

वाघनखांची वैशिष्ट्ये…
घटक- पोलाद, चामडे आणि रेशीम
लांबी- 8.6 सें.मी.
खोली- 9.5 सें.मी.
पट्टीची लांबी- 7.5 सें.मी.
अंगठ्याचा व्यास- 2.5 सें.मी. (मोठी)
अंगठ्याचा व्यास- 2.3 सें.मी. (लहान)
नखांतील अंतर (मोठी अंगठी ते लहान अंगठी)- 1.8 सें.मी.,  1.8 सें.मी., 1.5 सें.मी.
एकूण वजन- 49 ग्रॅम