प्रचाराच्या रणधुमाळीचा आज शेवटचा दिवस

मुंबई ः महाराष्ट्रातील लोकसभा निवडणुकीचा शेवटच आणि पाचवा टप्प्यासाठी सोमवारी मतदान होणार आहे, मात्र त्यापूर्वी प्रचाराच्या रणधुमाळीचा आज शनिवारी शेवटचा दिवस असून, सर्वच पक्षांनी मुंबईतील लोकसभेच्या 6 जागांवर लक्ष केंद्रीत केले आहे. पंतप्रधान नरेंद्र मोदी व मनसे अध्यक्ष राज ठाकरे यांच्या उपस्थितीत मुंबईत महायुतीची सभा झाल्यानंतर दुसर्‍या दिवशी म्हणजे शनिवारी पाचव्या टप्प्यातील प्रचाराच्या अखेरच्या दिवशी शिवसेना उद्धव बाळासाहेब ठाकरे पक्षाचे अध्यक्ष उद्धव ठाकरे तब्बल 4 सभा घेणार आहेत. उद्धव ठाकरे शनिवारी मुंबईतील महाविकास आघाडीच्या उमेदवारांसाठी ईशान्य मुंबई, दक्षिण मुंबई, दक्षिण मध्य मुंबई व उत्तर पश्‍चिम मुंबई या 4 लोकसभा मतदारसंघांत सभा घेणार आहेत. या जागांवर ठाकरे गटाचे संजय दिना पाटील, अनिल देसाई, अरविंद सावंत व अमोल किर्तीकर हे उमेदवार आहेत.