व्यापार करारामुळे रुपयाची ऐतिहासिक झेप

नवी दिल्ली : भारतीय चलन बाजारात मंगळवारी महत्त्वपूर्ण घडामोड घडली. अमेरिकी डॉलरच्या तुलनेत रुपयाने लक्षणीय मजबुती दाखवत 90.40 या पातळीपर्यंत झेप घेतली. सुरुवातीच्या व्यवहारात सुमारे 1.2 टक्क्यांची वाढ नोंदवली गेली असून, गेल्या काही वर्षांतील ही रुपयाची सर्वात मोठी एकदिवसीय मजबुती मानली जात आहे. सोमवारी 91.51 वर बंद झालेल्या रुपयाने अवघ्या एका दिवसात दिशाबदल करत बाजाराला सकारात्मक संकेत दिले.
रुपयातील या तेजीमागे भारत आणि अमेरिका यांच्यात झालेला महत्त्वाचा व्यापार करार निर्णायक ठरला आहे. अमेरिकेने भारतीय वस्तूंवरील आयात शुल्कात मोठी कपात करण्याचा निर्णय जाहीर केल्यानंतर गुंतवणूकदारांचा भारतीय अर्थव्यवस्थेवरील विश्‍वास वाढला आहे. या निर्णयाचा फायदा आयटी, वस्त्रोद्योग तसेच रत्न व दागिने क्षेत्राला होण्याची शक्यता व्यक्त केली जात आहे. चलन बाजारातील या घडामोडींचा थेट परिणाम शेअर बाजारावरही दिसून आला. बीएसई सेन्सेक्सने मोठी उसळी घेत 85,000 अंकांचा टप्पा ओलांडला, तर निफ्टी 50 निर्देशांक 26,500 च्या दिशेने वाटचाल करताना दिसला. बाजार विश्‍लेषकांच्या मते, या व्यापार करारामुळे परदेशी संस्थागत गुंतवणूकदारांचा भारतातील ओघ वाढू शकतो आणि अलीकडे सुरू असलेली भांडवल माघारी घेण्याची प्रक्रिया मंदावण्याची शक्यता आहे. रुपयाच्या मजबुतीमुळे देशाच्या अर्थव्यवस्थेला दिलासा मिळणार असून, विशेषतः कच्चे तेल आणि इलेक्ट्रॉनिक वस्तूंच्या आयातीवरील खर्च कमी होण्यास मदत होईल. याचा सकारात्मक परिणाम चालू खात्यातील तूट नियंत्रणात ठेवण्यावर होऊ शकतो. काही दिवसांपूर्वी 92 च्या पुढे घसरलेल्या रुपयाने केलेले हे जोरदार पुनरागमन आर्थिक स्थैर्याचे संकेत देणारे मानले जात आहे. तसेच, दीर्घकालीन सरकारी रोख्यांच्या परताव्यात झालेली घसरणही सकारात्मक आर्थिक वातावरणाचे द्योतक असल्याचे तज्ज्ञांचे मत आहे.