युद्धाचा शेवट इराणी सैन्य ठरवणार; इराणच्या इस्लामिक रिव्होल्यूशनरी गार्ड कॉर्प्सचा इशारा

तेहरान : इराणमधील सुरू असलेल्या संघर्षाबाबत कधी आणि कशा प्रकारे समाप्ती करायची, याचा निर्णय इराणच घेईल, असा ठाम इशारा तेहरानकडून देण्यात आला आहे. अमेरिकेचे माजी राष्ट्राध्यक्ष डोनाल्ड ट्रम्प यांनी युद्ध लवकरच थांबू शकते, असे वक्तव्य केल्यानंतर इराणकडून ही प्रतिक्रिया व्यक्त करण्यात आली.
इराणच्या इस्लामिक रिव्होल्यूशनरी गार्ड कॉर्प्स (आयआरजीसी) ने स्पष्ट केले की, या भागातील सामरिक घडामोडी आणि पुढील परिस्थिती आता तेहरानच्या लष्करी निर्णयांवर अवलंबून आहे. युद्धाचा शेवट बाहेरील शक्तींनी ठरवण्याऐवजी इराणचे सैन्यच त्याबाबत अंतिम निर्णय घेईल, असेही या निवेदनात नमूद करण्यात आले. याआधी ट्रम्प यांनी इराणविरोधातील संघर्ष फार काळ चालणार नाही, असे संकेत दिले होते. मात्र, इराणकडून जागतिक खनिज तेल पुरवठ्यात अडथळा निर्माण झाल्यास परिस्थिती अधिक गंभीर होऊ शकते, असा इशाराही त्यांनी व्यक्त केला होता. दरम्यान, तेहरानकडून दिलेल्या या प्रतिक्रियेमुळे पश्‍चिम आशियातील तणाव आणखी वाढण्याची शक्यता व्यक्त केली जात आहे. या संघर्षाच्या पार्श्‍वभूमीवर पुढील काही दिवसांत लष्करी व राजनैतिक घडामोडी अधिक वेगाने घडण्याची शक्यता तज्ज्ञांनी व्यक्त केली आहे.