सुरेंद्रकुमार आणि विशाल अग्रवालला 31 मेपर्यंत पोलिस कोठडी

पुणे ः पुण्यातील कल्याणीनगर येथील पोर्शे कार अपघात प्रकरणी अल्पवयीन मुलाचे आजोबा सुरेंद्रकुमार अग्रवाल आणि वडील विशाल अग्रवालला 4 दिवसांपर्यंत पोलिस कोठडी सुनावण्यात आली आहे. दोघेही आता 31 मेपर्यंत पोलिस कोठडीत असणार आहेत. सुरेंद्रकुमार आणि विशाल अग्रवाल या दोन्ही बाप-लेकाला मंगळवारी न्यायालयात हजर करण्यात आले. ड्रायव्हरचे अपहरण, मुलाचा गुन्हा स्वतःवर घ्यावा, अन तसे न केल्यास जीवे मारण्याची धमकी दिल्याप्रकरणी कोर्टामध्ये सुनावणी झाली. अल्पवयीन आरोपीचे आजोबा सुरेंद्रकुमार आधी अटकेत होते. विशाल अग्रवालला याप्रकरणी उशीरा अटक दाखवण्यात आलेली आहे. कोर्टामध्ये दोन्ही पक्षाच्या बाजूने जोरदार युक्तीवाद झाला. सरकारी वकील आणि बचाव पक्षाचे वकील यांच्यामध्ये खडाजंगी झाली. दोन्ही बाजू ऐकून घेतल्यानंतर कोर्टाने आरोपी सुरेंद्रकुमार आणि विशाल अग्रवाल यांना 31 मे पर्यंत पोलिस कोठडी सुनावली आहे.