गटशिक्षणाधिकारी यांच्या दालनात विद्यार्थ्यांनी भरवली शाळा 

कर्जत : अहिल्यानगर जिल्ह्यातील कर्जत तालुक्यामधील शेगुड या गावांमधील जिल्हा परिषद प्राथमिक शाळेमध्ये मागील तीन वर्षांपासून शिक्षक नाही. यामुळे आज त्या शाळेमधील विद्यार्थ्यांनी कर्जत पंचायत समितीच्या गटशिक्षण अधिकारी यांच्या दालनामध्ये शाळा भरवली. 

 कर्जत तालुक्यातील शेगुड येथील जिल्हा परिषद प्राथमिक शाळेमध्ये मागील तीन वर्षांपासून शिक्षक मिळत नसल्यामुळे विद्यार्थ्यांचे मोठे शैक्षणिक नुकसान होत आहे यामुळे संतप्त पालक आणि विद्यार्थ्यांनी आज थेट पंचायत समितीच्या गटशिक्षणाधिकारी यांच्या दालनामध्ये शाळा भरवली. व आम्ही रोज शाळेमध्ये जातो पण शिक्षक नसल्यामुळे केवळ भात खाऊनच घरी येतो असे विद्यार्थी यावेळी म्हणाले. उपस्थित पालकांनी शिक्षक मिळाल्याशिवाय  आता आम्ही परत जाणार नाही अशी भूमिका घेतली होती. अखेर त्या शाळेवर तात्काळ एका शिक्षकाची नेमणूक गटशिक्षणाधिकारी प्रदीप  चव्हाण  यांना करावी लागली. यावेळी सरपंच  शांतीलाल मासाळ, संदीप शेगडे, राजेंद्र नलवडे, बबन शिरसाट, भाऊ कोकाटे, माधव शेगडे, मंगेश गोरे, गणेश पांढरे व ग्रामस्थ आणि मोठ्या संख्येने विद्यार्थी उपस्थित होते. यावेळी विद्यार्थ्यांनी त्याच ठिकाणी जोरात पाढे म्हणण्यास सुरुवात केल्यामुळे सर्व पंचायत समिती दणाणून सोडली होती.