नांदेड रेल्वे विभाग : सन 2025 मध्ये कार्मिक विभागाची उल्लेखनीय कामगिरी

नांदेड । प्रतिनिधी
नांदेड रेल्वे विभागाच्या कार्मिक विभागाने सन 2025 या वर्षात सेवाविषयक बाबी, पदोन्नती, निवृत्तीवेतनाशी संबंधित प्रकरणे तसेच डिजिटल सक्षमीकरण या क्षेत्रांत महत्त्वपूर्ण टप्पे गाठत प्रशंसनीय व लोकाभिमुख प्रशासनाचे उत्तम उदाहरण सादर केले आहे.
या कालावधीत विभागाने एकूण 47 अनुकंपा नियुक्ती प्रकरणे यशस्वीरीत्या निकाली काढली असून त्यामध्ये 27 प्रलंबित प्रकरणांचा समावेश होता. यामुळे कोणतेही प्रकरण तीन महिन्यांपेक्षा अधिक काळ प्रलंबित राहणार नाही, याची प्रभावी अंमलबजावणी सुनिश्चित करण्यात आली असून वेळेत तक्रार निवारणाच्या दिशेने हे एक महत्त्वपूर्ण पाऊल ठरले आहे. दक्षिण मध्य रेल्वेमध्ये प्रथमच मानव संसाधन व्यवस्थापन प्रणाली (एचआरएमएस) अंतर्गत मंत्रालयीन कर्मचार्‍यांच्या पदोन्नतीसाठी उपयुक्तता मॉड्यूल कार्यान्वित करण्यात आले. या पथदर्शी उपक्रमामुळे पदोन्नती प्रक्रिया अधिक सुलभ, पारदर्शक व पूर्णतः डिजिटल स्वरूपात पार पडत आहे. कर्मचार्‍यांच्या करिअर प्रगतीबाबत विभागाची कटिबद्धता अधोरेखित करत, सन 2025 मध्ये 724 पदोन्नती तसेच 114 सुधारित आश्वासित करिअर प्रगती योजना (एमएसीपी) प्रकरणांना मंजुरी देण्यात आली. याचा विविध श्रेणींतील मोठ्या संख्येने कर्मचार्‍यांना लाभ झाला आहे. निवृत्तीविषयक प्रकरणांच्या निकाली काढण्यातही विभागाने लक्षणीय प्रगती साधली आहे. यामध्ये 59 सामान्य निवृत्ती व 29 इतर निवृत्ती प्रकरणांचा समावेश असून, यामुळे कर्मचारी व निवृत्तीवेतनधारकांना वेळेवर दिलासा मिळाला आहे. याशिवाय, नांदेड विभागात डिजिटल साक्षरता मोहीम राबविण्यात आली. या मोहिमेमुळे निवृत्तीवेतनधारक व कौटुंबिक निवृत्तीवेतनधारकांना डिजिटल जीवन प्रमाणपत्र तयार करणे सुलभ झाले असून, डिजिटल माध्यमातून सोयीस्कर सेवा, नियमांचे पालन व वेळेची बचत शक्य झाली आहे. कार्मिक विभागाची ही एकूण कामगिरी कार्यक्षमता, पारदर्शकता, कर्मचारी कल्याण आणि डिजिटल परिवर्तनाप्रती असलेली ठाम बांधिलकी अधोरेखित करते. यामुळे नांदेड रेल्वे विभागाच्या प्रशासकीय उत्कृष्टतेत मोलाची भर पडली आहे.