कवाडे गट जाणार शिंदे गटासोबत ?

मुंबई प्रतिनिधी – राज्यात शिवशक्ती भीमशक्तीचा नवा प्रयोग अस्तित्वात येण्याची चिन्हे आहेत. वंचित बहुजन आघाडीने शिवसेनेसोबत युती करण्यास होकार कळवल्यानंतर शिंदे गट देखील सक्रिय झाला असून, शिवसेनेला उत्तर देण्याची तयारी शिंदे गटाने सुरु केली आहे.  पीपल्स रिपब्लिकन पार्टीचे नेते जोगेंद्र कवाडे आणि जयदीप कवाडे यांनी मुख्यमंत्री एकनाथ शिंदे यांची वर्षा निवासस्थानी भेट घेतली. त्यामुळे लवकरच कवाडे हे शिंदे गटात सामील होणार आहे.
एका बाजूला उद्धव ठाकरे आणि वंचित बहुजन आघाडीचे बाळासाहेब आंबेडकर हे एकत्र येत असल्याच्या चर्चा सुरू असतानाच पीपल्स रिपब्लिकन पक्षाचे कार्याध्यक्ष आणि जोगेंद्र कवाडे यांचे पुत्र जयदीप कवाडे यांनी युतीचे संकेत दिले असून लवकरच महाराष्ट्रामध्ये चांगले चित्र पाहायला मिळेल असे सूचक वक्तव्य केले आहे. विशेष म्हणजे, गेल्या काही महिन्यांपासून पीपल्स रिपब्लिकन पक्ष महाविकास आघाडीवर नाराज होता. त्यामुळे बाळासाहेबांच्या शिवसेनेसोबत पीपल्स रिपब्लिकन पार्टीचे माजी खासदार जोगेंद्र कवाडे आणि जयदीप कवाडे यांनी भेट घेतल्याने राज्यात वेगळे समीकरण पाहायला मिळणार आहे. आता लवकरच मुख्यमंत्री एकनाथ शिंदे आणि माजी खासदार जोगेंद्र कवाडे एकत्र दिसतील, असे खुद्द जोगेंद्र कवडे यांचे पुत्र जयदीप कवाडे यांनी सांगितले आहे.