अजित पवारांना महायुतीतून बाहेर काढा

पुणे : महायुतीमध्ये सर्व काही आलबेल नसल्याचे समोर येत आहे. उपमुख्यमंत्री अजित पवारांना महायुतीतून बाहेर काढा, असा पावित्राच भाजपच्या कार्यकर्त्यांनी घेतला आहे. अजित पवार सत्तेत असतील तर आम्हाला सत्ता नको, पुण्याचे पालकमंत्री म्हणून अजित पवार आमच्या बोकांडी बसवले आहे, असे म्हणत भाजपच्या कार्यकर्त्यांनी संताप व्यक्त केला आहे. भाजप आमदार राहुल कुल यांच्यासमोरच भाजपचे पुणे जिल्हा उपाध्यक्ष आणि पुणे बाजार समितीचे संचालक सुदर्शन चौधरी यांनी शिरूर लोकसभा आढावा बैठकीमध्ये खदखद बोलून दाखवली आहे. हा व्हिडीओ सोशल मीडियावर प्रचंड व्हायरल होत आहे.
भाजपचे पुणे जिल्हा उपाध्यक्ष सुदर्शन चौधरी म्हणाले अजित पवारांना या महायुतीतून बाहेर काढा, असे प्रत्येक कार्यकर्त्याचे मत आहे. याला तुम्ही सल्ला समजलात तरी चालेल. अजित पवारांनी सुभाष बापू, राहुल दादांवर, योगेश अण्णांवर अन्याय केला आहे. हे तिघेही मंत्री झाले असते. अनेक लोकांना महामंडळ मिळाले असते. अजितदादांकडे आमचे आबासाहेब सोनावणे आणि श्याम गावडे निधी मागायला गेले तर अजितदादा म्हणाले तुमचा काय संबंध, आम्ही 10 टक्केच निधी देणार… अरे नको आम्हाला अशी सत्ता.. असा संताप भाजपच्या कार्यकर्त्यांनी व्यक्त केला. अजित पवारांनी भाजप कार्यकर्त्यांवर अन्याय केला आहे. अजित पवार सत्तेत असतील तर आम्हाला सत्ता नको. पुणे आणि सोलापूर जिल्ह्याची अशीच परिस्थिती आहे. सोलापूरला कायम बाहेरच्या जिल्ह्याचा पालकमंत्री मिळाला आहे. स्वाभिमानी नेतृत्त्व पुणे जिल्ह्याला मिळत नाही. पुणे जिल्ह्यातील लोकांचे हाल झाले आहे. ज्या राष्ट्रवादीचा गेली 10 वर्षे आम्ही विरोध करतोय तीच राष्ट्रवादी तुम्ही आमच्या बोकांडी आणून ठेवली आहे. अक्षरश: कार्यकर्ते भीतीच्या वातावरणात आहे. अजित पवारांना कशासाठी सत्तेत घेतले आहे? असा सवाल देखील भाजप पुणे जिल्हा उपाध्यक्षांनी केला आहे.