काँगे्रससाठी “कुटुंब” तर आमच्यासाठी “राष्ट्र” प्रथम ! : पंतप्रधान मोदी

नवी दिल्ली : राष्ट्रपतींचे अभिभाषण देशाला दिशा दाखवणारे आणि प्रेरणादायी, प्रभावी आणि भविष्यातील कामासाठी आपल्या सर्वांसाठी मार्गदर्शक होते. ते ज्याला जसे समजले, त्याने तसे समजावून सांगितले. मात्र काँगे्रस मॉडेलमध्ये कुटुंब प्रथम आहे तर आमच्यासाठी राष्ट्र प्रथम असल्याची खोचक टीका पंतप्रधान नरेंद्र मोदी यांनी गुरूवारी राज्यसभेत केली.
राष्ट्रपतींच्या अभिभाषणावर बोलतांना पंतप्रधान मोदी पुढे म्हणाले की, डॉ. बाबासाहेब आंबेडकरांना अनुसूचित जाती-जमाती समुदायाची आर्थिक असहायता संपवायची होती. काँग्रेसने ते एका गंभीर संकटात बदलले. 2014 मध्ये, आमच्या सरकारने ही विचारसरणी बदलली. आम्ही कौशल्य विकास आणि औद्योगिक विकासावर भर दिला. विश्‍वकर्मा योजना तयार करून, पहिल्यांदाच पारंपारिक कामात गुंतलेल्या लोकांबद्दल काळजी दाखवण्यात आली. आम्ही त्यांना प्रशिक्षण, साधने, डिझाइनिंगमध्ये मदत, आर्थिक सहाय्य आणि बाजारपेठ दिली. आम्ही मुद्रा योजनेद्वारे अशा लोकांना मदत केली जे पहिल्यांदाच व्यवसायात येत होते. आम्ही त्यांना हमीशिवाय कर्ज दिले. बाबासाहेब आंबेडकरांना समाजाच्या कल्याणाची आवड होती. त्यांनी अनुसूचित जाती-जमातींच्या विकासासाठी एक रोड मॅप दिला होता. त्यांनी म्हटले होते की भारत हा कृषीप्रधान देश आहे, परंतु तो दलितांसाठी उपजीविकेचे साधन बनू शकत नाही. कारण जमीन खरेदी करणे त्यांच्या क्षमतेच्या पलीकडे आहे. दुसरे म्हणजे, त्यांच्याकडे पैसे असले तरी त्यांना जमीन खरेदी करण्याची संधी नाही. दलित आणि आदिवासींवर होणार्‍या अन्यायावर उपाय म्हणजे देशाच्या औद्योगिकीकरणाला चालना देणे, असे बाबासाहेबांनी सुचवले होते. जेणेकरून त्यांना आर्थिक स्वावलंबनाच्या संधी मिळतील. स्वातंत्र्याच्या इतक्या वर्षांनंतरही, बाबासाहेब आंबेडकरांचे हे शब्द विचारात घेतले गेले नाहीत. काँग्रेसने ते नाकारले अशी टीका यावेळी पंतप्रधान मोदी यांनी केली.

एकाच कुटुंबांतील तीन खासदार कधी होते का?
पंतप्रधान मोदी यांनी आपल्या भाषणात विरोधी पक्षनेते राहुल गांधी यांच्या भाषणाचा चांगलाच समाचार घेतला. पंतप्रधान मोदी म्हणाले की, जे लोक गरिबांच्या झोपड्यांमध्ये फोटो सेशन करून स्वतःचे मनोरंजन करतात त्यांना संसदेत गरिबांबद्दल बोलणे कंटाळवाणे वाटेल. राहुल गांधींनी त्यांच्या भाषणात पुन्हा एकदा जातीय जनगणनेची मागणी पुन्हा केली. यावर उत्तर देताना मोदी म्हणाले – कृपया कोणीतरी मला सांगा की संसदेत एकाच वेळी अनुसूचित जाती किंवा जमाती वर्गातील एकाच कुटुंबातील 3 खासदार होते का? पंतप्रधानांनी गांधी कुटुंबावर ही टीका केली. सध्या राहुल आणि प्रियंका लोकसभेत खासदार आहेत आणि त्यांची आई सोनिया गांधी राज्यसभेत खासदार आहेत, असा टोला लगावला.

दिव्यांग, ट्रान्सजेंडर आणि महिला सक्षमीकरणार भर दिला
पंतप्रधान म्हणाले की, भारताच्या विकास प्रवासात नारी शक्तीचे योगदान कोणीही नाकारू शकत नाही. जर त्यांना संधी मिळाली आणि धोरणे आखण्याची संधी मिळाली तर देशाच्या विकासाला आणखी गती मिळू शकते. नवीन सभागृहात, आम्ही नारी शक्ती वंदन विधेयक आणले आणि महिलांना त्यांचे अधिकार दिले. आम्ही त्याची सुरुवात महिला शक्तीला सलाम करून केली. यासोबतच आपल्या देशात अपंगांचे कधीच ऐकले गेले नाही. सबका साथ, सबका विकास या मंत्राने दिव्यांगांनाही आरक्षण मिळू शकते. आम्ही त्यांच्या सुविधांसाठी मिशन मोडवर काम केले. योजना बनवल्या आणि त्या अंमलातही आणल्या. ट्रान्सजेंडर हक्कांसाठी प्रामाणिक काम केले. आम्ही सर्वांच्या पाठिंब्यासाठी आणि सर्वांच्या विकासासाठी जगतो, असे प्रत्युत्तर पंतप्रधान मोदी यांनी यावेळी दिले.