राजधानी दिल्लीत आगीचा भडका

नवी दिल्ली : गुजरात राज्यातील राजकोटमध्ये गेमिंग झोनमध्ये लागलेल्या आगीत 24 जणांचा होरपळून मृत्यू झाल्याची घटना ताजी असतांनाच, राजधानी पूर्व दिल्लीतील विवेक विहार येथील दिल्ली न्यू बॉर्न बेबी केअर हॉस्पिटलला शनिवारी मध्यरात्री नवजात बालकांच्या खासगी रुग्णालयात भीषण आग लागली. या भीषण आगीत 7 मुलांचा होरपळून मृत्यू झाला. तर इतर 5 नवजात बालके गंभीर आहेत. दिल्ली अग्निशमन सेवाकडून मिळालेल्या माहितीनुसार, विवेक विहार येथील न्यू बॉर्न बेबी केअर हॉस्पिटलमध्ये शनिवारी रात्री उशिरा भीषण आग लागली. घटनास्थळी पोहोचलेल्या अग्निशमन दलाच्या जवानांनी एकूण 12 मुलांना वाचवले. यापैकी 7 गंभीर भाजलेल्या नवजात बालकांचा मृत्यू झाला होता तर इतर 5 नवजात बाळकांची प्रकृती ही गंभीर आहे. घटनास्थळी अजूनही बचावकार्य सुरू आहे. आगीची माहिती मिळताच पोलीस अधिकारी व अग्निशमन दलाच्या जवानांनी घटनास्थळी धाव घेत आग आटोक्यात आणली. अग्निशमन अधिकार्‍याने दिलेल्या माहितीनुसार, आग पूर्णपणे विझवण्यात आली आहे. घटनास्थळावरून सुटका करण्यात आलेल्या नवजात बालकांना दुसर्‍या रुग्णालयात दाखल करण्यात आले आहे. दिल्ली अग्निशमन सेवेने सांगितले की, आगीची माहिती मिळाल्यानंतर अग्निशमन दलाच्या नऊ गाड्या घटनास्थळी पाठवण्यात आल्या असून बचावकार्य सुरू आहे. डीएफएस प्रमुख अतुल गर्ग यांनी सांगितले की, मध्यरात्री एक फोन आला होता. आगीचे कारण कळू शकलेले नाही. पोलिसांकडून मिळालेल्या माहितीनुसार, शनिवारी मध्यरात्री 11.30 च्या सुमारास विवेक विहार पोलिस स्टेशनला एका रुग्णालयात आग लागल्याचा पीसीआर कॉल आला होता. कॉल मिळताच विवेक विहारचे एसीपी आणि एसएचओ तात्काळ पोलिस दलासह घटनास्थळी पोहोचले, जेथे न्यू बॉर्न बेबी केअर हॉस्पिटल आणि शेजारील इमारतीला आग लागल्याचे दिसले. इमारतीच्या वरच्या मजल्यावरून इतर लोकांच्या मदतीने 11 नवजात बालकांची सुटका करण्यात आली आणि रुग्णवाहिकेद्वारे त्यांना पूर्व दिल्ली प्रगत एनआयसीयू हॉस्पिटल, डी-237, विवेक विहार येथे उपचारासाठी हलवण्यात आले. ही तीन मजली इमारत असून आगीत संपूर्ण इमारत जळून खाक झाल्याचे अधिकार्‍यांनी सांगितले.

ऑक्सिजन सिलिंडर रिफिलिंगदरम्यान आग लागल्याची शक्यता – आगीचे कारण अद्याप स्पष्ट झालेले नाही, मात्र अग्निशमन विभाग आणि पोलिस अधिकार्‍यांचे म्हणणे आहे. मात्र, बेबी केअर सेंटरजवळील अ‍ॅम्ब्युलन्समध्ये ऑक्सिजन गॅस रिफिल केला जात असल्याचे आतापर्यंतच्या तपासात समोर आले आहे. त्याचवेळी स्फोटाचा मोठा आवाज ऐकू आला. अशा स्थितीत ऑक्सिजन सिलिंडरचा स्फोट झाल्याने ही आग लागली असण्याची शक्यता आहे. मात्र, अद्याप त्याची पुष्टी झालेली नाही.