एकनाथ शिंदेच्या अडचणी वाढल्या

पुणे: शिवसेनेचे बंडखोर नेते एकनाथ शिंदे यांच्याविरोधात पुण्यातील प्रथमवर्ग न्यायालयात एक याचिका दाखल करण्यात आली आहे. या याचिकेद्वारे शिंदे यांच्या निवडणूक शपथपत्रात त्रुटी किंवा लपवाछपवी असल्याचा आरोप करण्यात आला आहे. अभिजित खेडकर, डॉ. अभिशेष हरिसाद यांनी ही याचिका वकील समीर शेख यांच्यामार्फत दाखल केली आहे. याचिकेत म्हटले आहे की, निवडणुकीआधी दाखल केलेल्या शपथपत्रात शिंदे यांनी शेतजमीन, वाहनं, मालमत्ता आणि शिक्षणाविषयीच्या माहितीत लपवाछपवी केली आणि यातील माहितीत तफावत आढळून आली आहे. 2009, 2014 आणि 2019 या विधानसभा निवडणुकीत कोपरी-पाचपाखाडी मतदारसंघातून शिंदेंनी निवडणूक लढवलेली होती. या निवडणुकांमध्ये सादर करण्यात आलेल्या शपथपत्राच्या आधारे उपरोक्त आरोप करण्यात आले आहेत. याचिकेतून करण्यात आलेल्या आरोपांमध्ये शेत जमिनीचा खोळ, गाड्यांच्या किंमतीत तफावत, नोटरीच्या शिक्क्यामध्ये एक्स्पायरी डेट लपवली, शिक्षण अकरावीपर्यंत, पण शाळा वेगवेगळ्या, इमारत खरेदीची माहिती लपवली आदींचा समावेश आहे
वृत्तपत्रात प्रसिद्ध झालेल्या माहितीनुसार, एकनाथ शिंदे यांनी 2009, 2014 च्या शपथपत्रात शेतजमीन नसल्याचे नमूद केले. पण 2019 मध्ये त्यांच्या पत्नीने ठाणे जिल्ह्यातील चिखलगावात जमीन खरेदी केल्याचा उल्लेख आहे. चिखलगावच्या सर्वे नंबर 844, 845 ही जमीन 6 ऑगस्ट 2009 मध्येच खरेदी केल्याचे नमूद केले. तर 2014, 2019 मधीळ शपथपत्रात व्यवसाय, नोकरीच्या तपशिलामध्ये उत्पन्नाच्या स्त्रोतात शेतकरी असल्याचे नमूद केलेले नाही. 2014 च्या शपथपत्रात आर्माडा गाडी आठ लाखाला खरेदी केल्याचे म्हटले आहे. तर 2019 मध्ये हीच गाडी 96,720 रुपयांना खरेदी केल्याचे म्हटले आहे. 2014 मध्ये स्कॉर्पिओ 11 लाख रुपयांना खरेदी केली होती. पण 2019 मध्ये हीच गाडी अवघ्या 1.33 हजार रुपयांना खरेदी केल्याचे दाखवले आहे. 2014 मध्ये 6.96 हजार रुपयांना घेतलेल्या बोलेरोची किंमत 2019 मध्ये मात्र 1.89 हजार रुपयांना घेतल्याचे दाखवले आहे. 2014मध्ये एक टेम्पो 92,224 रुपयांना खरेदी केल्याचे म्हटले आहे. पण 2019 मध्ये याच टेम्पोची किंमत त्यांनी 21,360 रुपये इतकी दाखवली आहे. 2014च्या शपथपत्रात 17.70 लाखाला खरेदी केलेली इनोव्हा कारची किंमत 2019 मध्ये 6.42 लाख रुपयांत खरेदी केल्याचे शपथपत्रात नमूद करण्यात आले आहे.

अकरावी पर्यंतचं शिक्षण वेगवेगळ्या शाळेतून?
शिंदे यांचे शिक्षण अकरावीपर्यंत झाले आहे. मात्र त्यातही एक गडबड दिसून येते. 2009 मध्ये त्यांनी आपल्या शपथपत्रात ठाण्याच्या मंगला हायस्कूल एन्ड ज्युनिअर कॉलेजमधून 1981 साली उत्तीर्ण झाल्याचे म्हटले आहे. तर 2019 च्या शपथपत्रामध्ये त्यांनी ठाण्यातील न्यू इंग्लिश हायस्कूलमधून 1981 साली अकरावी उत्तीर्ण झाल्याचे म्हटले आहे.

मालमत्तेबाबत लपवाछपवी
2014 च्या एकनाथ शिंदे यांच्या शपथपत्रात पत्नीकडे एक व्यावसायिक इमारत नसल्याचे म्हटले आहे. पण 2019 मध्ये त्यांनी पत्नीकडे ठाण्यातील वागळे इस्टेटमध्ये 007 प्लॉट नंबर बी 51 येथे व्यावसायिक (कमर्शिअल) इमारत 20 नोव्हेंबर 2002 रोजी खरेदी केल्याचे म्हटले आहे. असे असताना त्यांनी 2014 मध्ये ही माहिती का लपवली, असा प्रश्न उपस्थित करण्यात आला आहे.
वृत्तपत्रात प्रसिद्ध झालेल्या माहितीनुसार, शिंदे यांनी 2014च्या शपथपत्रात हाऊस नंबर 5, लँडमार्क को.ऑ.हौ.सो.ली. फायनल प्लॉट नंबर 60, इस्टर्न एक्स्प्रेस, ठाणे ही निवासी इमारत 1 कोटी 6 लाख 27 हजार 815 रुपयांना खरेदी केल्याचे म्हटले आहे. तर 2019 मध्ये याच इमारतीची किंमत त्यांनी 1 कोटी 6 लाख 27 हजार 495 रुपये इतकी दाखवण्यात आली आहे.