थंडी आणि धुक्यामुळे रेल्वे गाड्यांना विलंब

नवी दिल्ली : दिल्लीमध्ये सकाळी दाट धुके पसरले होते. दृश्यता मागील काही दिवसांच्या तुलनेत सुधारलेली असली तरी रेल्वे प्रवाशांना मोठ्या अडचणींचा सामना करावा लागला. दिल्लीहून ये-जा करणार्‍या 45हून अधिक गाड्या उशिराने धावत आहेत. यामध्ये कालका शताब्दी, डेहराडून शताब्दी आणि दरभंगा हमसफर या प्रमुख गाड्यांचा समावेश आहे. अनेक लोकल गाड्याही विलंबाने धावत आहेत.
दिल्लीच्या अनेक भागांत सकाळी धुके दिसून आले, मात्र मागील दिवसांच्या तुलनेत दृश्यता चांगली होती. इंदिरा गांधी आंतरराष्ट्रीय विमानतळावर सकाळी 8.30 वाजता दृश्यता 600 मीटर इतकी नोंदवण्यात आली. धुक्यामुळे रेल्वे प्रवाशांना सातत्याने त्रास सहन करावा लागत आहे. दिल्लीकडे येणार्‍या आणि दिल्लीहून जाणार्‍या 45हून अधिक गाड्या उशिराने धावत आहेत. कालका शताब्दी, डेहराडून शताब्दी आणि दरभंगा हमसफर यांसह अनेक गाड्यांच्या वेळापत्रकात बदल करण्यात आला आहे. काही लोकल गाड्या अर्धा तास ते अडीच तास उशिराने धावत असून, त्यामुळे दररोज प्रवास करणार्‍या प्रवाशांना मोठा त्रास होत आहे. दरम्यान, दिल्लीतील हवेची गुणवत्ता ‘अतिशय खराब’ या श्रेणीत कायम आहे. केंद्रीय प्रदूषण नियंत्रण मंडळाच्या अ‍ॅपनुसार गुरूवारी सकाळी 9 वाजता दिल्लीचा एअर क्वालिटी इंडेक्स (एक्यूआय) 371 इतका नोंदवण्यात आला.