मंत्रालयाला टाळे ठोकण्याचा प्रयत्न

मुंबई ः राज्यात मराठा आरक्षणाचा प्रश्‍न चिघळत असतांना, बुधवारी मराठा आमदारांनी आक्रमक पवित्रा घेत, थेट मंत्रालयाला टाळे टोकण्याचा प्रयत्न केला. पोलिसांनी या मराठा आमदारांना ताब्यात घेतले आहे. यावेळी आमदार आक्रोश करताना दिसून येत होते. राज्यात सुरू असलेल्या मराठा आंदोलनाची धग आता मंत्रालयापर्यंत पोहोचली आहे.
 मराठा संघटनांकडून गावबंदी करण्यात आल्यानंतर राज्यातील सर्वपक्षीय मराठा आमदार एकत्रित आले आहेत. बुधवारी मराठा आमदारांनी मंत्रालय परिसरात आंदोलन केले. या आंदोलनात आमदार राजू नवघरे, अमोल मिटकरी, राहुल पाटील, कैलास पाटील, विक्रम काळे, चेतन तुपे, बाबासाहेब आजबे, यशवंत माने, निलेश लंके, बाळासाहेब पाटील, दिलीप बनकर, बाबाजानी दुर्रानी, मोहन उबर्डे सहभागी झाले होते. यावेळी आमदारांकडून घोषणाबाजी करत मंत्रालयाला टाळे ठोकण्याचा प्रयत्न करण्यात आला. कोणत्याही मंत्र्याला आम्ही मंत्रालयात जाऊ देणार नाही. मराठा आरक्षणासाठी अधिवेशन बोलवा, अशी मागणी आमदारांकडून करण्यात आली. तेव्हा पोलीस आणि आमदारांमध्ये झटापट झाली. दरम्यान, मुंबई पोलिसांनी जवळपास 25 आमदारांना ताब्यात घेतले असून त्यांना स्थानबद्ध करण्यात आल्याचे बोलले जात आहे. त्यामुळे आता यावरून नव्या वादाला तोंड फुटण्याची शक्यता आहे.यावेळी आंदोलन करणार्‍या आमदारांनी प्रतिक्रिया देताना म्हटले की, महाराष्ट्र विधानसभेने एक दिवसाचे तात्काळ आधिवेशन बोलवावे, मराठा आंदोलनाच्या संदर्भात ज्या मराठा समाजाच्या भावना आहेत, मागण्या आहेत त्या पूर्ण कराव्यात, अशी मागणी यावेळी आमदारांकडून करण्यात आली आहे.

मंत्री हसन मुश्रीफ यांची गाडी फोडली – राज्याचे वैद्यकीय शिक्षणमंत्री हसन मुश्रीफ यांच्या वाहनाची मराठा आंदोलकांनी तोडफोड केल्याची घटना समोर आली आहे. मुंबईत मराठा आरक्षणासाठी आक्रमक मराठा आंदोलकांनी ही तोडफोड केली आहे. या प्रकरणी पोलिसांनी दोन आंदोलकांना ताब्यात घेतले आहे. हसन मुश्रीफ यांची कार आकाशवाणी आमदार निवासाबाहेर उभी होती. त्यांनी अचानक आलेल्या काही जणांनी हसन मुश्रीफ यांच्या कारवर हल्ला चढवला. कारच्या काचा फोडल्या आहेत. या घटनेनंतर मंत्रालय आणि आसपासच्या परिसरात पोलिस बंदोबस्त वाढवण्यात आला आहे.