अभिनेत्री तमन्ना भाटियाला पोलिसांचे समन्स

मुंबई ः महाराष्ट्र सायबर पोलिसांनी अभिनेत्री तमन्ना भाटिया हिला देखील समन्स पाठवले आहेत. ’वायकॉम 18’ ग्रुपच्या प्रसारण अधिकारांचे उल्लंघन करणार्‍या महादेव बेटिंग अ‍ॅपच्या फेअरप्ले ऍप्लिकेशनवर इंडियन प्रीमियर लीग अर्थात आयपीएल 2023 च्या सामन्यांच्या बेकायदेशीर स्ट्रीमिंगच्या संदर्भात अभिनेत्री तमन्ना भाटियाला महाराष्ट्र सायबर विभागाने चौकशीसाठी बोलावले आहे. फेअरप्ले सट्टेबाजी अ‍ॅपवर आयपीएल सामने पाहण्यासाठीची जाहिरात केल्याबद्दल समन्स बजावण्यात आले असून, तमन्ना भाटियाला 29 एप्रिल रोजी सायबर सेलसमोर चौकशीसाठी हजर राहण्यास आणि साक्षीदार म्हणून तिचा जबाब नोंदवण्यास सांगण्यात आले आहे.