कोयत्याने हल्ला करत केली तरुणाची हत्या

पुणे ः पुण्यात गेल्या काही दिवसांपासून कोयता टोळीची दहशत वाढत असून, त्यांच्याकडून दिवसाढवळया कोयत्याने हल्ले करण्याचे प्रकार सीसीटीव्हीमध्ये कैद झाले आहे. पोलिसांनी या टोळीच्या मुसक्या आवळण्याचा प्रयत्न केला असला, तरी कोयत्याने हल्ले होण्याचे प्रकार पुण्यात सुरुच आहेच. नववर्षाच्या मध्यरात्री वारजे माळवाडी भागात पूर्ववैमनस्यातून एका तरुणाचा निर्घृण खून करण्यात आल्याची घटना घडली.

वारजे पोलिसांनी तातडीने तपास करून चार संशयितांना अटक केली. भूमीपूत्र युवराज कांबळे (23, रा. वारजे) असे खून झालेल्याचे नाव आहे. याबाबत कांबळे याचा भाऊ वीरफकीरा याने वारजे पोलिस ठाण्यात फिर्याद दिली आहे. कांबळे आणि त्याचा मित्र मध्यरात्री वारजे भागातील विठ्ठलनगर परिसरातून निघाला होता. त्या वेळी आरोपी चिंक्या उर्फ ओंकार जगताप आणि साथीदारांनी त्याला गाठले. त्याच्यावर कोयत्याने हल्ला चढवला. कांबळे याच्या डोक्यात दगड मारला. या घटनेमुळे परिसरात घबराट उडाली. कांबळे याच्या मित्राने पोलिसांना या घटनेची माहिती दिली. त्यानंतर वारजे पोलिसांनी तातडीने तपास करत चार संशयितांना अटक केली असून वरिष्ठ पोलिस निरीक्षक डी. एस. हाके हे पुढील तपास करत आहेत.