उत्तर भारतात थंडीची लाट

पुणे : देशातील मिचाँग चक्रीवादळाचा जोर ओसरल्यानंतर राज्यातील थंडीचा जोर देखील ओसरला आहे. महाराष्ट्रात सध्या पुढील पाच-सात दिवस कोरडे हवामान राहण्याची शक्यता असून, उत्तर भारतात मात्र थंडीची लाट आली आहे.
हवामान विभागाच्या अंदाजानुसार पुढील 72 तासात हलके धुके पडण्याची शक्यता आहे. राज्यावरून वाहणार्‍या दक्षिण दक्षिण आग्नेय वार्‍यामुळे हवेतील आद्रता वाढली आहे. तसेच उत्तरेकडून येणारे वारे महाराष्ट्रापर्यंत पोहोचत नसल्यामुळे किमान तापमानात पुढील पाच ते सहा दिवस पुढे जास्त काही बदल होणार नाही. दरम्यान, तापमानात हलकी वाढ होणार असली तरी काही भागातील थंडी कायम राहणार आहे. सध्या उत्तर भारतात थंडीची लाट वाढली आहे. दिल्लीच्या तापमानात सुमारे 2 ते 3 डिग्री सेल्सिअसची घट झाली आहे. जम्मू काश्मीर, उत्तराखंड तसेच हिमालयात काही ठिकाणी बर्फवृष्टि सुरू झाली आहे. दरम्यान, काही दिवसांपूर्वी राज्याच्या बहुतेक भागात किमान तापमानात मोठी घट झाली होती. मात्र, आता उत्तरेकडून येणार्‍या थंड वार्‍यांचा वेग कमी झाल्यामुळे तापमानात थोडी वाढ होणार आहे. दक्षिणेकडून किंवा आग्नेयकडून येणार्‍या वार्‍यात बाष्प जास्त असल्याने आजही दक्षिण कोकण, दक्षिण महाराष्ट्र आणि मध्य महाराष्ट्रात काही ठिकाणी हवामान ढगाळ राहणार आहे. राजधानी दिल्लीत गेल्या चार दिवसांत किमान तापमानात तीन अंशांपेक्षा जास्त घट झाली आहे. सकाळपासून थंडीचा कडाका वाढला आहे. सोमवारची सकाळ या हंगामातील सर्वात थंड होती. दिल्लीच्या मानक वेधशाळा सफदरजंग येथे किमान तापमान सामान्यपेक्षा तीन अंशांनी कमी नोंदवले गेले. दुसरीकडे, दिल्लीतील लोक अत्यंत निकृष्ट दर्जाची हवा श्‍वास घेत असतील, परंतु गेल्या सहा वर्षांची तुलना केल्यास प्रदूषणाची पातळी कमी झाली आहे. सेंट्रल एअर क्वालिटी मॅनेजमेंट कमिशननुसार डिसेंबरच्या पहिल्या दहा दिवसांतील प्रदूषणाची पातळी गेल्या सहा वर्षांतील सर्वात कमी आहे. काश्मीर आणि हिमाचल प्रदेशातील उंच हिमालयीन भागात बर्फवृष्टी झाली, त्यानंतर दिल्लीच्या दिशेने येणारे वारे उत्तर-पश्‍चिम दिशेकडून वाहत आहेत. हे वारे थंड असल्यामुळे गेल्या चार दिवसांपासून तापमानात मोठी घट झाली आहे.