अभिनेत्री अक्षया देवधर आणि अभिनेता हार्दिक जोशी यांनी घेतले जेजुरीच्या खंडोबाच दर्शन

पुणे प्रतिनिधी – ‘तुझ्यात जीव रंगला’ म्हणत प्रेक्षकांच्या मनावर राज्य करणारी लोकप्रिय जोडी म्हणजे अभिनेत्री अक्षया देवधर आणि अभिनेता हार्दिक जोशी. या दोघांनी आपल्या अभिनयाने प्रेक्षकांना वेड लावलं. मालिकेत काम करता करता ही जोडी खरंच एकमेकांच्या प्रेमात पडली. अचानक साखरपुडा करत त्यांनी प्रेक्षकांना आश्चर्याचा धक्का दिला होता. आपल्या प्रेमाची कबुली देत अखेर त्यांनी लग्नगाठ बांधली. काही महिन्यांपूर्वीच त्यांचा विवाहसोहळा मोठ्या उत्साहात पार पडला. सोशल मीडियावर त्यांच्या लग्नातील फोटोंचा अगदी पूर आला होता. तरीही चाहते त्यांच्याबद्दल अधिक जाणून घेण्यास कायम उत्सुक असतात. आता प्रेक्षकांची ही लाडकी जोडी जेजुरीला पोहोचली आहे. त्याचा एक व्हिडिओ हार्दिकने चाहत्यांसोबत शेअर केला आहे. हा व्हिडिओ आता चाहत्यांमध्ये व्हायरल होतोय.हार्दिक आणि अक्षया लग्नानंतर पहिल्यांदाच जेजुरीला गेले होते. त्यामुळे ही जेजुरीवारी त्यांच्यासाठी खासच होती. या व्हिडिओत सुरुवातीला जेजुरी गड दिसतोय. त्यानंतर हार्दिक नवीन जोडप्याने पत्नीला उचलून घेण्याची जेजुरीची परंपरा पाळताना दिसतोय. तो अक्षयाला उचलून घेत गड चढताना दिसतोय. त्यानंतर ते खंडोबाचं दर्शन घेतात. देवाची पूजा करतात. अभिषेक घालताना दिसतायत. याप्रसंगी हार्दिक खंडोबा देवाची तलवारदेखील उचलून घेताना दिसतोय. तर त्या दोघांसोबत फोटो काढण्यासाठी तिथे चाहत्यांची एकच गर्दी पाहायला मिळतेय. पोलीस ही गर्दी आवरण्याचा प्रयत्न करताना दिसतायत. तर तिथलाच एक व्यक्ती तोंडाने खंडोबाची तलवार उचलताना दिसतोय. ते दोघेही हे क्षण अचंबित होऊन पाहत आहेत. त्यानंतर तिथले काही फोटो त्यांनी चाहत्यांसोबत शेअर केले आहेत. जेजुरी दर्शनाचा आनंद त्या दोघांच्याही चेहऱ्यावर ओसंडून वाहताना दिसत आहे. जेजुरीला जाताना अक्षयाने तिच्या आईची २५ वर्ष जुनी साडी नेसली होती. चाहत्यांनी या व्हिडिओवर भरभरून प्रेम केलं आहे. चाहत्यांनी व्हिडिओवर लाइक आणि कमेंटचा वर्षाव केला आहे. त्यांचा व्हिडिओ आता सोशल मीडियावर व्हायरल होत आहे.