पिंपळगाव उज्जैनी मध्ये विद्यार्थ्यांचे गुलाब पुष्प व झाडांचे रोप देऊन स्वागत

अहिल्यानगर :- येथील नवजीवन प्रतिष्ठान समन्वयीत व कमिन्स इंडिया फाउंडेशन अर्थसहाय्यित मॉडेल व्हिलेज प्रकल्प पिंपळगाव उज्जैनी येथे जिल्हा परिषद प्राथमिक शाळेतील विद्यार्थ्यांना शाळेच्या पहिल्या दिवसाच्या निमित्ताने आयोजित स्वागतोत्सवात वृक्षारोपण, पर्यावरण संवर्धन व सेंद्रिय शेती याबद्दल माहिती देत गुलाब पुष्प, आंबा, शेवग्याचे रोप तसेच पुस्तके, गणवेश व बूट भेट देऊन स्वागत करण्यात आले.
नवजीवन प्रतिष्ठानचे उदय पवार, पिंपळगाव उज्जैनीच्या सरपंच शांताबाई आढाव, मुख्याध्यापक रावसाहेब पिंपळे, पर्यावरण प्रेमी नवजीवन चे अमित गायकवाड, दिपक बत्तिशे, ग्रामस्थ, विद्यार्थी व शिक्षक यावेळी उपस्थित होते.
यावेळी पर्यावरण प्रेमी अमित गायकवाड यांनी पहिली ते सातवीच्या विद्यार्थ्यांना आपल्या दैनंदिन जीवनामधील झाडांचे महत्त्व, झाडाशी मैत्री, संगोपन व पर्यावरण संरक्षण कसे करावे याबद्दल माहिती दिली. झाडे आपल्याला फुले, फळे, औषध, ऑक्सिजन, सावली देतात. त्याचबरोबर झाडांमुळे पाऊस पडण्यास मदत होते. त्यामुळे आपण सर्वांनी झाडांशी मैत्री करून त्यांचे जतन व संवर्धन केले पाहिजे असे ते म्हणाले. यावेळी पिंपळगाव उज्जैनी येथील जिल्हा परिषद प्राथमिक शाळेच्या पहिलीच्या वर्गात प्रवेश घेणाऱ्या विद्यार्थ्यांचे गुलाबपुष्प, आंब्याचे रोप, शेवग्याची रोप तसेच पुस्तके गणवेश व बूट देऊन स्वागत करण्यात आले.
प्रारंभी सर्व विद्यार्थ्यांची सजविलेल्या ट्रॅक्टर मधून फेरी व वृक्षदिंडी काढण्यात आली. त्यानंतर विद्यार्थ्यांना खाऊचे वाटप करण्यात आले. भगवान राऊत यांनी सूत्रसंचालन केले. तर उदय पवार यांनी आभार मानले.