छत्तीसगडमध्ये 63 नक्षलवाद्यांचे आत्मसमर्पण

18 महिला नक्षलवाद्यांचा समावेश ‘लोन वर्राटू’ अभियानाला यश
रायपूर : छत्तीसगडमधील नक्षलवादविरोधी मोहिमेला आणखी एक महत्त्वाचे यश मिळाले आहे. दंतेवाडा जिल्ह्यात राबवण्यात येत असलेल्या ‘लोन वर्राटू’ (घरवापसी) अभियानाअंतर्गत शुक्रवारी तब्बल 63 नक्षलवाद्यांनी हिंसाचाराचा मार्ग सोडून आत्मसमर्पण केले. विशेष म्हणजे या आत्मसमर्पण करणार्‍यांमध्ये 18 महिलांचाही समावेश असून, ही बाब नक्षल संघटनांच्या आतल्या घडामोडींवर प्रकाश टाकणारी ठरते.
आत्मसमर्पण करणार्‍यांमध्ये पश्‍चिम बस्तर डिव्हिजन कमिटीचा सचिव मोहन कडती याचाही समावेश आहे. त्याने आपल्या पत्नीसह शस्त्रे खाली ठेवत प्रशासनासमोर आत्मसमर्पण केले. या सर्व नक्षलवाद्यांवर मिळून एक कोटी रुपयांहून अधिक रकमेची बक्षिसे जाहीर करण्यात आली होती, यावरून त्यांच्या संघटनांतील महत्त्वाची भूमिका अधोरेखित होते. एकाच वेळी एवढ्या मोठ्या संख्येने झालेल्या आत्मसमर्पणामुळे नक्षल चळवळीला मोठा मानसिक व संघटनात्मक धक्का बसल्याचे मानले जात आहे. विशेष बाब म्हणजे आत्मसमर्पण करणार्‍यांमध्ये छत्तीसगडबरोबरच इतर राज्यांतील नक्षलवाद्यांचाही समावेश आहे. त्यामुळे नक्षलवादविरोधी कारवायांचा प्रभाव राज्याच्या सीमांपलीकडे पोहोचत असल्याचे स्पष्ट होते. सुरक्षा दल आणि पोलीस यंत्रणांकडून सातत्याने राबवण्यात येणार्‍या सघन मोहिमांमुळे नक्षलवाद्यांवर दबाव वाढत आहे. त्याचबरोबर शासनाच्या पुनर्वसन धोरणांमुळे मुख्य प्रवाहात परतण्याचा विश्‍वासही निर्माण होत असल्याचे चित्र दिसते. ‘लोन वर्राटू’ अभियानाने केवळ शस्त्रबळावर नव्हे, तर संवाद आणि पुनर्वसनाच्या माध्यमातून नक्षलवादाला आव्हान देण्याचा प्रभावी मार्ग दाखवला आहे. आत्मसमर्पण केलेल्या नक्षलवाद्यांना शासनाच्या धोरणांनुसार पुनर्वसन, रोजगार व सामाजिक पुनर्स्थापनेसाठी आवश्यक मदत दिली जाणार आहे. यामुळे नक्षलप्रभावित भागांमध्ये शांतता प्रस्थापित होऊन विकासकामांना चालना मिळण्याची अपेक्षा व्यक्त केली जात आहे. एकूणच, ही घटना छत्तीसगड सरकार आणि सुरक्षा यंत्रणांसाठी महत्त्वाची उपलब्धी मानली जात असून, नक्षलवादाविरोधातील लढ्यात निर्णायक टप्प्याकडे वाटचाल सुरू असल्याचे संकेत देणारी ठरते.