नगर अर्बन बँकेच्या कर्जखात्यांचे फॉरेन्सिक ऑडीट

अहमदनगर/प्रतिनिधी : नगर अर्बन बँकेतील 28 कर्ज खात्यांतून घडलेल्या सुमारे दीडशे कोटी रुपयांच्या कर्ज घोटाळ्याच्या तपासात जप्त करण्यात आलेल्या कागदपत्रांचे व तपासात समोर आलेल्या आर्थिक व्यवहारांचे फॉरेन्सिक ऑडिट करण्यासाठी जिल्हा पोलिस प्रशासनाकडून एका संस्थेची नियुक्ती करण्यात आली आहे. लवकरच फॉरेन्सिक ऑडिटचे काम पूर्ण करण्यात येईल, अशी माहिती जिल्हा पोलिस अधीक्षक मनोज पाटील यांनी दिली. बँकेचे माजी संचालक व नगर अर्बन बँक बचाव कृती समितीचे प्रमुख राजेंद्र गांधी यांच्या फिर्यादीवरून नगर अर्बन बँकेतील कर्ज फसवणूक प्रकरणी कोतवाली पोलिस ठाण्यात गुन्हा दाखल करण्यात आला आहे. गांधी यांनी सुमारे 28 संशयित कर्ज खात्यांबाबत माहिती देऊन सुमारे 150 कोटी रुपयांचा घोटाळा झाल्याचा दावा केला होता. या गुन्ह्याचा तपास आर्थिक गुन्हे शाखेकडून सुरू आहे. उपअधीक्षक कमलाकर जाधव याचा तपास करीत आहेत. तो सुरू असताना या कर्ज घोटाळ्याची व्याप्ती मोठी असून, सुमारे साठच्यावर अशी प्रकरणे असल्याचा संशय आहे. त्यामुळे पोलिसांनी सर्वच कर्जखात्यांचे फॉरेन्सिक ऑडीट करण्याचा निर्णय घेतला आहे व त्यासाठी मध्यंतरी बँकेत तीन दिवस तळ ठोकून या कर्ज प्रकरणांशी संबंधित कागदपत्रे व फाईल्सही जप्त केल्या आहेत. ही कारवाई करताना खूप वर्षांपासून बँकेत पडून असलेल्या या फायलींवरील धुळीने पोलिसांना त्रासही झाला होता. मात्र, त्यानंतरही नेटाने या फायलींचा अभ्यास करून पोलिसांनी काही मुद्दे उपस्थित केले असून, त्याआधारे आता या कर्ज खात्यांची फॉरेन्सिक तपासणी होणार आहे.

कर्ज रकमांचा इतरत्र वापर
पोलिसांनी तपासादरम्यान बँकेकडून थकीत असलेल्या कर्ज प्रकरणांची माहिती व कागदपत्रे, फायली तपासासाठी जप्त केल्या आहेत. त्यांच्या तपासादरम्यान कर्ज घेण्यात आलेल्या रकमांचा वापर इतर कर्जांच्या थकीत रकमा जमा करण्यासाठी झाल्याचे समोर आले होते. तसेच ज्या कारणांसाठी कर्ज घेण्यात आले आहे, त्याऐवजी कर्जाच्या रकमेचा बेकायदेशीरपणे इतरत्र वापर करण्यात आला, काही रकमा इतरांच्या खात्यात वर्ग करण्यात आल्याचे तपासात स्पष्ट झाले होते. त्यामुळे प्राप्त झालेल्या सर्व कागदपत्रांचे व खात्यांमधील आर्थिक व्यवहारांचे फॉरेन्सिक ऑडिट करण्याचा निर्णय पोलिस प्रशासनाने घेतला होता. त्यासाठी काही संस्थांकडून प्रस्ताव मागविण्यात आले होते. प्राप्त झालेल्या तीन प्रस्तावांपैकी एका संस्थेची नेमणूक फॉरेन्सिक ऑडिट करण्यासाठी करण्यात आल्याचे पोलिस अधीक्षक पाटील यांनी सांगितले. लवकरच याचा तपास व ऑडिट पूर्ण होईल, असेही त्यांनी स्पष्ट केले.