थाटण्यापूर्वीच कोरोनाने विखुरला संसार

 पुणे / प्रतिनिधीः देशात कोरोना विषाणूची दुसर्‍या लाट आल्यापासून कोरोनाबाधित रुग्णांच्या मृत्यूचे प्रमाणही वाढले आहे. परिणामी दररोज असंख्य रुग्णांचा मृत्यू होत आहे. अशातच पिंपरीतील एका कुटुंबावर दुःखाचा डोंगर कोसळला आहे. कोरोना विषाणूने संबंधित कुटुंबातील दोन कर्त्या लेकरांचा घास घेतला आहे. काही दिवसांत लग्न होणार, याचे स्वप्न रंगवणार्‍या मुलाचा कोरोनाने घात केला आहे. त्यामुळे संसार थाटण्यापूर्वीच विखुरला आहे. आदित्य आणि अपूर्व अशी या दोन मृत भावंडांची नावे आहेत. 

आदित्यचे दीड वर्षापूर्वी लग्न झाले होते, तर अपूर्वचे लग्न ठरले होतं. येत्या दिवाळीत तो विवाहबंधनात अडकणार होता; पण कोरोनाने त्याचे स्वप्न हिरावले आहे. या दोघांसोबतच आईवडील आणि आदित्यची पत्नी यांनाही कोरोनाची बाधा झाली होती. या पाचही जणांना पिंपरीतील वेगवेगळ्या रुग्णालयांत दाखल करण्यात आले होते. कोरोना विषाणूला हरवून पुन्हा एकत्र येऊ असा सर्वांना विश्‍वास होता. ते सर्वजण एकमेकांना फोन करून धीर देत होते; पण दोघां सख्ख्या भावांनी कोरोना विषाणूपुढे हार पत्करली आहे. ऑक्सिजन पातळीत घट झाल्याने शुक्रवारी दुपारी अपूर्वने आणि शनिवारी पहाटे आदित्यने जगाचा निरोप घेतला आहे. त्यांचे वडील पुण्यातील वायसीएम रुग्णालयात अतिदक्षता विभागात उपचार घेत आहेत. दुसरीकडे सासू आणि सून कोरोनातून बर्‍या होऊन घरी परतल्या आहेत; पण दोन कर्त्या मुलांचा मृत्यू झाल्याने त्यांना आपल्या अश्रूंचा बांध आवरता येत नाही. विशेष म्हणजे आपली दोन मुले आपल्यापासून हिरावली असल्याची पुसटशीही कल्पनाही मृतांच्या वडीलांना नाही. दत्तवाडी आकुर्डी येथील रहिवासी असणारे विजय जाधव यांचे मध्यमवर्गीय सुखी कुटुंब होते. अगदी प्रतिकूल परिस्थितीवर मात करून त्यांनी संसाराचा गाडा हाकलला होता. दोन्ही मुले चांगल्या ठिकाणी कामाला होती. घरात सर्वकाही सुखात सुरू होते; पण अचानक कोरोनाने त्यांच्या आयुष्यात काळ म्हणून प्रवेश केला आणि काही क्षणात होत्याचे नव्हते केले. घरातील सर्वांना कोरोनाची लागण झाल्याचे निष्पन्न झाल्यानंतर सर्वजण लवकरच बरे होऊन परतू असा विश्‍वास घेऊन रुग्णालयात गेलेल्या या दोन्ही भावंडांचा काही तासांच्या अंतराने दुर्दैवी मृत्यू झाला आहे.