एकविरा देवी, राजगडावल लवकरच रोप वे

पुणे/प्रतिनिधीः पुणे जिल्ह्यातील एकविरा देवी मंदिर आणि राजगड किल्ल्यावर पर्यटकांना लवकरच रोप-वेची सुविधा उपलब्ध होणार आहे. कृषी पर्यटनाला चालना देण्यासाठी हा उपक्रम राबविण्यात येणार असून, हे दोन्ही रोप-वे प्रकल्प बांधा, वापरा, हस्तांतरित करा (बीओटी) तत्त्वावर बांधण्याचे प्रस्तावित आहे. पर्यटन विभागासाठी हा पथदर्शी प्रकल्प ठरणार आहे.  

पर्यटनमंत्री आदित्य ठाकरे यांच्या उपस्थितीत रोप-वेसाठी आर्थिक आणि तांत्रिक सुसाध्यता अहवाल तयार करण्याचा तसेच निविदा व्यवस्थापन प्रक्रिया राबविण्यासाठी भारतीय पोर्ट रेल, रोप वे महामंडळ (आयपीआरसीएल) यांच्यासोबत पर्यटन संचालनालयाचा करार करण्यात आला आहे. सह्याद्री अतिथीगृहामध्ये झालेल्या कार्यक्रमामध्ये ठाकरे यांच्यासह राज्यमंत्री आदिती तटकरे, पर्यटन विभागाच्या प्रधान सचिव वल्सा नायर-सिंह, एमटीडीसीचे व्यवस्थापकीय संचालक आशुतोष सलील, पर्यटन संचालक डॉ. धनंजय सावळकर, भारतीय पोर्ट रेल व रोप वे महामंडळाचे संचालक अनिलकुमार गुप्ता, सहकार विकास महामंडळाचे व्यवस्थापकीय संचालक मिलिंद आकरे आदी उपस्थित होते. पर्यटनाला प्रोत्साहन देण्याच्या अनुषंगाने आम्ही अनेक निर्णय घेतले आहेत. राज्याचे बीच शॅक धोरण, कृषी पर्यटन धोरण, कॅराव्हॅन पर्यटन धोरण जाहीर केले आहे. लवकरच साहसी पर्यटन धोरणही जाहीर होणार आहे, अशी माहिती तटकरे यांनी दिली. एकविरा मंदिर आणि राजगड किल्ला ही दोन्ही ठिकाणे राज्याची भक्ती आणि शक्तीपीठे आहेत. रोप-वेमुळे भाविक आणि पर्यटकांना या ऐतिहासिक स्थळांवर पोहोचणे अधिक सुलभ होणार आहे. यातून पर्यटनाला चालना मिळेल. येत्या वर्षभरात काम पूर्ण करण्याचे उद्दिष्ट आहे. एकविरा देवी मंदिर लोकप्रिय तीर्थक्षेत्र आहे. या ठिकाणी असलेल्या कार्ला लेणी पर्यटकांचे आकर्षण आहेत. मंदिरात वर्षभरात सात ते आठ लाख भाविक भेट देतात. राजगड किल्ला छत्रपती शिवाजी महाराजांच्या राज्याची सुमारे 25 वर्षे राजधानी होती. त्यामुळे या किल्ल्याला ऐतिहासिक महत्त्व आहे. ट्रेकिंगसाठी हे लोकप्रिय ठिकाण आहे, अशी माहिती पर्यटन संचालक डॉ. धनंजय सावळकर यांनी दिली. पुण्यातील लोकप्रिय आणि ऐतिहासिक सिंहगडावरील पर्यटनाला चालना देण्यासाठी रोप-वे प्रकल्प करण्याची तयारी सुरू होती. पुणे महानगर प्रदेश विकास प्राधिकरण (पीएमआरडीए) आणि वन विभागाकडून त्यासाठी विविध परवानग्या देण्यात आल्याचा दावा केला जात आहे. रोप-वेच्या जागेसाठी मोजणीही झाली आहे; पण प्रत्यक्ष कामाला अजून सुरुवात झालेली नाही. त्यामुळे या किल्ल्यासाठी रोप-वेचा प्रकल्प त्वरेने मार्गी लावावा, अशी अपेक्षा केली जात आहे.