अहमदनगर मधील सीना नदी पूरनियंत्रण रेषेचे होणार फेर सर्वेक्षण

अहमदनगर प्रतिनिधी : नगर शहरातून वाहणार्‍या सीना नदीच्या पूर नियंत्रण रेषेबाबत फेर सर्वेक्षणाचे आदेश देण्यात आले आहेत. याच बरोबर सीना नदी खोलीकरण व रुंदीकरणासाठी लागणार्‍या निधीसाठी तातडीने अंदाजपत्रक तयार करण्याचे आदेश जलसंपदा राज्यमंत्री बच्चू कडू यांनी दिले आहेत. लवकरात लवकर हे अंदाजपत्रक सादर करावे व त्यानंतर तातडीने रुंदीकरणासाठी निधी उपलब्ध करून दिला जाईल, अशी ग्वाहीही त्यांनी दिली आहे. नगर शहरातून वाहत असलेल्या सीनानदीचे पात्र सुमारे 14 किलो मीटर असून शहराच्या मध्यवर्ती भागातून ही नदी वाहते. त्यामुळे शासनाच्या नियमानुसार सीना नदीच्या पूररेषेची हद्द सुमारे 500 मीटरच्या दरम्यान असल्यामुळे सेना नदीलगत राहणार्‍या नागरिकांना कुठल्याही प्रकारची बांधकामाची परवानगी मिळत नाही. या अशा नियमामुळे शहरातील 50 टक्के नागरिकांना यापूर नियंत्रण रेषेच्या प्रश्‍नाला सामोरे जावे लागत आहे. हा प्रश्‍न कायमस्वरूपी मार्गी लावण्यासाठी आ. संग्राम जगताप यांनी शासन दरबारी पाठपुरावा केल्यामुळे दि.25 मे रोजी जलसंपदा राज्यमंत्री बच्चू कडू यांच्या दालनात ही पूर नियंत्रण रेषा शिथिल करण्याबाबत बैठकीचे आयोजन करण्यात आले होते. यावेळी राज्यमंत्री कडू यांनी जगताप यांच्या मागणीनुसार नदी पात्राच्या सर्वेक्षणाचे आदेश दिले आहेत.
आ. जगताप यांनी केलेल्या पाठपुराव्याला अखेर यश आले आहे. नुकत्याच काही महिन्यांपूर्वी जलसंपदा मंत्री जयंत पाटील हे नगर दौर्‍यावर आले असता त्यांनी प्रत्यक्षात सीनानदी पूर नियंत्रण रेषेची घटनास्थळी जाऊन पाहणी केली. सीनानदीचा उगम नगर शहरालागत असल्यामुळे एकदाही सीना नदीचा पूर शहरामध्ये पसरला नाही. पावसाळ्यामध्ये अनेकदा पूरपरिस्थिती निर्माण झाली, परंतु हे पाणी शहराच्या कोणत्याही भागात घुसले नाही. या सर्व बाबी शासनासमोर निदर्शनास आणल्या व त्यामुळे सीनानदी पूर नियंत्रण फेरसर्वेक्षण आदेश राज्यमंत्री कडू यांनी दिला आहे अशी माहिती आ. जगताप यांनी दिली.