संत ज्ञानेश्‍वर स्कूलमध्ये पहिल्या दिवशी विद्यार्थ्यांचे जल्लोषात स्वागत

कोपरगाव तालुका ः संत ज्ञानेश्‍वर इंग्लिश मिडीअम स्कूल येथे सन 2024-25 या शैक्षणिक वर्षाचा शाळा प्रवेशोत्सव चैतन्यमय व आनंददायी वातावरणात साजरा झाला. शाळेतर्फे विद्यार्थ्यांच्या स्वागतासाठी जय्यत तयारी करण्यात आली होती. मुलांना शाळेची गोडी लागावी व भीती वाटू नये यासाठी पहिल्या दिवशी त्यांना आवडतील अशा गोष्टी वर्गामध्ये ठेऊन वर्गाच्या भिंती देखील आकर्षकपणे सजविण्यात आल्या होत्या.
शाळेच्या पहिल्याच दिवशी विद्यार्थ्यांचे शिक्षकांनी औक्षण करीत वाजत गाजत पुष्पगुच्छ व आकर्षक वेलकम बोर्ड हातात देऊन स्वागत करण्यात आले. तसेच शाळेच्या परिसरात विविध रंगांनी भरलेली रांगोळी काढण्यात आली, फुग्यांची आरास करण्यात आली, सेल्फी पॉईंट तयार करण्यात आला व तसेच कार्टूनचे कट आऊट्स लावण्यात आले. तर बालवाडीच्या विद्यार्थ्यांचा शाळेचा पहिलाच दिवस असल्याने आई-वडिलांसोबत आलेले चिमुकले काहीसे कावरे-बावरे होत त्यांनी शाळेची वाट धरली तर काही आई-वडिलांना मिठी मारून रडतानाचे दृश्य शाळेच्या पहिल्या दिवशी बघायला मिळाले.शाळेत राबवत असलेले कृतियुक्त शिक्षण,वेळेचे योग्य नियोजन व उत्कृष्ट निकालाची परांपरा यामुळे शाळेत प्रवेश घेण्यासाठी पालकांनी उत्कृष्ट प्रतिसाद देत गर्दी केल्याचे दिसून आले. तसेच पालकांच्या हस्ते शाळेच्या वतीने विद्येची देवता माता सरस्वतीचे व संत ज्ञानेश्‍वर माऊलींचे पूजन करण्यात आले. विद्यार्थ्यांचे स्वागत प्रसंगी शाळेचे कार्यकारी विश्‍वस्त विशाल झावरे,मुख्याध्यापक सचिन मोरे, उपमुख्याध्यापिका वैशाली लोखंडे तसेच शिक्षक व शिक्षकेतर कर्मचारी उपस्थित होते.