ममता बॅनर्जींचे धरणे आंदोलन तिसर्‍या दिवशीही सुरू

कोलकाता : पश्‍चिम बंगालच्या मुख्यमंत्री ममता बॅनर्जी यांचे धरणे आंदोलन रविवारी तिसर्‍या दिवशीही सुरू राहिले. मतदार यादीतून नावे वगळली जात असल्याचा आरोप करत त्यांनी निवडणूक प्रक्रियेबाबत गंभीर आक्षेप नोंदवले.
ममता बॅनर्जी यांनी आरोप केला की, सत्ताधारी पक्ष मतदार यादीतून योग्य मतदारांची नावे काढण्यासाठी निवडणूक यंत्रणेचा गैरवापर करत आहे. त्यांनी निवडणूक आयोगावरही टीका करत त्याला लोकशाही प्रक्रियेबाबत निष्क्रिय असल्याचा आरोप केला. त्यांच्या मते, एक देश, एक नेता आणि एकच पक्ष अशी राजकीय भूमिका पुढे नेण्यासाठी लोकशाही संस्थांचा भाजपकडून वापर केला जात आहे. केंद्र सरकारवर टीका करत त्यांनी असा दावा केला की, देशाच्या संविधानिक रचनेवर दबाव आणण्याचा प्रयत्न सुरू आहे. राज्यात मतदार यादीच्या विशेष पुनरावलोकन प्रक्रियेविरोधात 6 मार्चपासून कोलकाता येथील धर्मतळा परिसरात त्यांनी आंदोलन सुरू केले आहे. राज्यातील लोकांच्या हक्कांसाठी हे आंदोलन सुरू असल्याचे त्यांनी सांगितले. धरणे आंदोलनादरम्यान त्यांनी भाजपवर सत्तेसाठी कोणत्याही संस्थेचा वापर केल्याचा आरोप केला, तर राज्यातील जनतेच्या हिताचे रक्षण करण्यासाठी आपली भूमिका कायम राहील, असेही स्पष्ट केले. त्यांच्या या आंदोलनावरून केंद्रीय निवडणूक आयोग नेमकी काय भूमिका घेतो, यावर त्यांच्या आंदोलनाची पुढील दिशा ठरणार आहे.