केजमध्ये मकर संक्रांतीचा उत्साह; तिळगूळ घ्या, गोड गोड बोलाच्या जयघोषाने परिसर दुमदुमला

केज । प्रतिनिधी
केज शहरासह परिसरात आज मकर संक्रांतीचा सण अत्यंत उत्साहात आणि पारंपरिक पद्धतीने साजरा करण्यात आला. थंडीच्या कडाक्यातही नागरिकांनी एकमेकांना तिळगूळ घ्या, गोड गोड बोला म्हणत शुभेच्छा दिल्या आणि स्नेहाचा संदेश पसरवला. सकाळपासूनच शहरातील मंदिरांमध्ये भाविकांची मोठी गर्दी पाहायला मिळाली तर गच्चीवर पतंगांची रंगत मनोहारी होती.
मकर संक्रांतीच्या सणाच्या निमित्ताने मागील दोन दिवसांपासूनच केजच्या मंगळवार पेठ, कानडी रोड आणि इतर भागात खरेदीची जोरदार गती होती. नागरिकांनी सुगड, ऊस, बोरं, गाजर तसेच तिळासाठी बाजारपेठेतील दुकाने गजबजलेली होती. सकाळी महिलांनी पारंपरिक पद्धतीने सुगडांचे पूजन केले. दुपारी 3 वाजेपासून सुरू होणार्‍या पूजेच्या मुहूर्तानुसार शहरातील विविध मंदिरांमध्ये वाण देण्यासाठी आणि हळदी-कुंकवासाठी मोठी तयारी पाहायला मिळाली. शहराच्या विविध गच्चींवर तरुणाईने पतंग उडवण्याचा जोरदार उत्साह दाखवला. काट रे काट च्या घोषणांनी परिसर गाजवला. विशेष म्हणजे प्रशासनाच्या आवाहनाला प्रतिसाद देत केजच्या नागरिकांनी नायलॉन मांजा वापरणे टाळले. यामुळे सुरक्षित आणि पर्यावरणपूरक पतंगबाजीचे उदाहरण घडले. केजमधील प्रमुख मंदिरांमध्ये विशेष धार्मिक कार्यक्रमांचे आयोजन करण्यात आले होते. शिक्षक कॉलनी: हनुमान मंदिर, गणपती मंदिर, राष्ट्रसंत भगवान बाबा मंदिर इतर देवस्थाने: शुक्रवार पेठेतील बालाजी मंदिर, देशपांडे गल्लीतील समर्थ मठ, वकीलवाडीतील हनुमान मंदिर सर्व ठिकाणी संक्रांतीच्या मुहूर्तावर विशेष पूजा-अर्चा करण्यात आली. दानधर्माला महत्त्व देत अनेकांनी गरजू लोकांना मदत केली. सूर्यदेवाला तिळाचे लाडू व गुळाच्या पोळीचा नैवेद्य दाखवून कृतज्ञता व्यक्त केली. केजमध्ये सणाची रंगत आणि आनंद अशा प्रकारे दिसून आली की, नागरिकांनी पारंपरिक मूल्यांशी एकात्मतेने जोडलं आणि पर्यावरणपूरक सण साजरा करण्याचा संदेश दिला.