अखेर खडसेंच्या जावई गिरीश चौधरीला जामीन मंजूर

नवी दिल्ली : राष्ट्रवादीचे ज्येष्ठ नेते एकनाथ खडसे यांचे जावई गिरीश चौधरी यांना जामीन मंजूर झाला आहे. ते तब्बल दीड वर्षांपासून तुरुंगात होते. अनेक वेळा गिरीश चौधरी यांचा जामीनासाठी अर्ज फेटाळला जात होता. भोसरी एमआयडीसी प्रकरणी अखेर सुप्रीम कोर्टाने गिरीश चौधरी यांचा जामीन मंजूर केला आहे.
यापूर्वी या प्रकरणात भाजपा-शिवसेना सरकारमध्ये एकनाथ खडसे महसूल मंत्री असताना, त्यांना मंत्रिपदाचा राजीनामा द्यावा लागला होता. तसेच या प्रकरणी त्यांच्या पत्नी मंदाकिनी खडसे यांची देखील तपासादरम्यान चौकशी करण्यात आली होती. अखेर एकनाथ खडसे यांचे जावई गिरीश चौधरी यांना सर्वोच्च न्यायालयाने जामीन मंजूर केला आहे. मनी लॉन्ड्रिंग प्रकरणी गिरीष चौधरी हे साधारण दीड वर्षापासून जेलमध्ये होते, ईडीच्या कारवाईत त्यांना ही जेल झाली होती. पुण्यातील भोसरीमध्ये 3.1 एकर जमीन खरेदीत, एकनाथ खडसे यांनी महसूल मंत्रीपदाचा गैरवापर केल्याचा आरोप त्यांच्यावर आहे. यापूर्वी खडसे यांच्या पत्नी मंदाकिनी खडसे यांच्यावर देखील अटकेची टांगती तलवार असल्याचे बोलले जात होते. 2016 मधील हे प्रकरण आहे, 31 कोटी रुपयांचा 3.1 एकर जमीनाचा हा भूखंड एकनाथ खडसे यांचे जावई आणि पत्नी यांनी 3.7 कोटी रुपयांना विकत घेतल्याचा आरोप त्यांच्यावर आहे. हा भूखंड अब्बास उकानी यांच्या मालकीचा आहे. एमआयडीसीसाठी हा भूखंड 1971 मध्ये अधिग्रहित झाला होता, पण अजूनही अब्बास उकानी यांना भरपाई देण्याचा मुद्दा न्यायालयात प्रलंबित आहे. कथित आरोपात एकनाथ खडसे मंत्री असताना त्यांनी याच दरम्यान अधिकार्‍यांची बैठक बोलावली, बैठकीत त्यांनी हा मुद्दा चर्चेला घेतला. ही बैठक 12 एप्रिल 2016 रोजी झाली, यात अब्बास उकानी या मूळ मालकाला हा 3.1 एकर जमीनाचा भूखंड परत द्यायचा की, त्यांना अधिक भरपाई द्यायची, याविषयी त्वरीत निर्देश देण्याचे आदेश दिले गेले आहेत.