काँगे्रसचा हिंदूंचे विभाजन करण्याचा डाव ;पंतप्रधान मोदींची टीका

मुंबई : काँगे्रसने स्वतःला सातत्याने बेजबाबदार पक्ष बनल्याचे सिद्ध केले आहे. देशात फूट पाडण्यासाठी तो नव-नव्या योजना आखत आहे. काँग्रेसचा फॉर्म्युला स्वच्छ आहे की मुस्लिमांना भीती घाला, त्यांचे वोट बँकेत रुपांतर करा. काँग्रेसच्या एकाही नेत्याने म्हटले नाही की मुस्लीमांमध्ये किती जाती असतात. मुस्लीम जातींची गोष्ट निघताच त्यांच्या तोंडावर कुलूप लागते. पण हिंदूची गोष्ट निघते तेव्हा त्यांची चर्चा जातीवरूनच सुरू होते. काँगे्रसकडून हिंदूमध्ये फूट पाडून त्यांचे विभाजन करण्याचा डाव आहे. हिंदू समाजात काँगे्रसकडून आग लावण्याचा प्रयत्न सुरू असल्याची घणाघाती टीका पंतप्रधान नरेंद्र मोदी यांनी बुधवारी केली.
पंतप्रधान मोदी यांनी बुधवारी दुरदृष्यप्रणालीद्वारे महाराष्ट्रात 7600 कोटी रुपयांच्या विविध विकास प्रकल्पांची पायाभरणी केली. यावेळी ते बोलत होते. यावेळी बोलतांना पंतप्रधान मोदी म्हणाले की,काँग्रेस निवडणूक पूर्णपणे जातीय आणि जातीय आधारावर लढते. काँग्रेसच्या राजकारणाचा आधार हिंदू समाजाला फोडून आपल्या विजयाचे सूत्र बनवणे हा आहे. काँग्रेस भारतातील ’सर्वजन हिताय-सर्वजन सुखाय’ ही परंपरा दडपत आहे, सनातनची परंपरा दडपत आहे. काँग्रेसने नेहमीच फूट पाडा आणि सत्ता मिळवा हे सूत्र पाळले आहे. काँग्रेस हा बेजबाबदार पक्ष असल्याचे वेळोवेळी सिद्ध झाले आहे. समाजात फूट पाडण्याचा फॉर्म्युला घेऊन ते आजही नवनवीन नॅरेटिव्ह तयार करत आहेत. पंतप्रधान म्हणाले की, महाराष्ट्रात विकासाला वेग आला आहे, आम्ही मराठी भाषेला नवी ओळख दिली आहे. आज महाराष्ट्राला 10 वैद्यकीय महाविद्यालये आहेत. नागपूर विमानतळाच्या आधुनिकीकरण व विस्तारीकरणाचे काम आणि शिर्डी विमानतळासाठी टर्मिनल इमारत बांधणे, या दोन महत्त्वाच्या पायाभूत सुविधांशी संबंधित प्रकल्पांची पायाभरणीही आज करण्यात आली. या सर्व विकासकामांसाठी मी महाराष्ट्रातील जनतेचे अभिनंदन करतो असे ते म्हणाले. महाराष्ट्राच्या इतिहासात एवढ्या वेगाने आणि एवढ्या मोठ्या प्रमाणावर विविध क्षेत्रांत विकास कधीच झाला नव्हता. होय, ही वेगळी बाब आहे की काँग्रेसच्या राजवटीत विविध क्षेत्रात एवढ्या वेगाने आणि एवढ्या प्रमाणात भ्रष्टाचार झाला.

अभिजात भाषेमुळे मराठी जनतेचे स्वप्न पूर्ण झाले
काही दिवसांपूर्वीच आपण मराठी भाषेला अभिजात भाषेचा दर्जा दिला आहे. जेव्हा एखाद्या भाषेला वैभव प्राप्त होते तेव्हा केवळ शब्दच नव्हे तर संपूर्ण पिढीला नवीन शब्द मिळतात. कोट्यवधी मराठी जनतेचे अनेक दशकांचे स्वप्न पूर्ण झाले आहे. ते म्हणाले की, महाराष्ट्रातील लोकांनी हा सर्वत्र आनंदोत्सव साजरा केला. आज महाराष्ट्रातील प्रत्येक गावातून मला आनंदाचे संदेश पाठवले जात आहेत. मराठीला अभिजात भाषेचा दर्जा दिल्याबद्दल महाराष्ट्रातील जनता त्यांच्या संदेशांमध्ये माझे आभार मानत आहे, परंतु मला सांगायचे आहे की हे काम माझ्यामुळे नाही तर तुमच्या सर्वांच्या आशीर्वादाने झाले असल्याचे पंतप्रधान नरेंद्र मोदी यांनी म्हटले आहे.