ग्रामपंचायत सदस्याच्या कुटुंबाला जिवंत जाळण्याचा प्रयत्न

भंडार्‍यातील थरारक घटना; पेट्रोल बॉम्ब हल्ल्याने गावात दहशत
भंडारा ः जिल्ह्यातील शहापूर परिसरात शनिवारी पहाटेच्या सुमारास घडलेल्या एका धक्कादायक घटनेमुळे संपूर्ण गावात भीतीचे वातावरण निर्माण झाले आहे. ग्रामपंचायत सदस्याच्या घरावर थेट पेट्रोल बॉम्ब फेकून कुटुंबाला जिवंत जाळण्याचा प्रयत्न केल्याचा गंभीर प्रकार उघडकीस आला असून, या घटनेमुळे परिसरात खळबळ उडाली आहे. सुदैवाने कुटुंबीय जागे असल्याने आणि वेळीच प्रसंग ओळखल्याने कोणतीही जीवितहानी झाली नाही. मात्र या हल्ल्यात घरासमोरील वाहने जळून खाक झाली असून, मोठे आर्थिक नुकसान झाले आहे.
शहापूर ग्रामपंचायतीचे सदस्य सचिन गाडेकर यांच्या निवासस्थानी अज्ञात हल्लेखोरांनी हा हल्ला केल्याची माहिती समोर आली आहे. पहाटेच्या शांत वातावरणात अचानक घराच्या आवारात पेट्रोल बॉम्ब फेकण्यात आला. बॉम्ब फुटताच आगीने उग्र रूप धारण केले. घराच्या अंगणात उभ्या असलेल्या चार दुचाकी तसेच घरासमोरील एक कार यांना आग लागली. काही क्षणांतच या वाहनांनी पेट घेतला आणि पूर्णपणे जळून खाक झाले. आगीचे लोळ घरापर्यंत पोहोचण्याची शक्यता निर्माण झाली होती, मात्र प्रसंग वेळीच लक्षात आल्याने मोठा अनर्थ टळला. आग लागल्याचे लक्षात येताच गाडेकर कुटुंबीयांनी जोरदार आरडाओरड केली. आवाज ऐकताच शेजारील नागरिक घटनास्थळी धावून आले. नागरिक जमा होत असल्याचे लक्षात येताच हल्लेखोरांनी अंधाराचा फायदा घेत घटनास्थळावरून पळ काढल्याचे सांगितले जाते. स्थानिक नागरिकांनी पाणी आणि उपलब्ध साधनांच्या मदतीने आग आटोक्यात आणण्याचा प्रयत्न केला. तोपर्यंत वाहनांचे मोठ्या प्रमाणावर नुकसान झाले होते. या हल्ल्यामागे नेमके कारण काय, याबाबत अद्याप स्पष्टता नाही. वैयक्तिक वाद, जुन्या भांडणातून उगवलेला सूड, की स्थानिक राजकारणातील वैर यापैकी कोणता धागा या घटनेशी संबंधित आहे, याचा शोध पोलीस घेत आहेत.

पोलिसांचा तपास सुरू; नागरिकांमध्ये संताप
घटनेची माहिती मिळताच जवाहरनगर पोलिस तात्काळ घटनास्थळी दाखल झाले. पोलिसांनी पंचनामा करून परिसरातील सीसीटीव्ही फुटेज तपासण्यास सुरुवात केली असून, अज्ञात हल्लेखोरांचा शोध घेण्यासाठी तपासाची चक्रे वेगाने फिरवली जात आहेत. ग्रामपंचायत सदस्याच्या घरावर थेट पेट्रोल बॉम्ब हल्ला झाल्याने नागरिकांमध्ये तीव्र संताप व्यक्त केला जात आहे. अशा प्रकारच्या घटनांमुळे गावातील शांतता धोक्यात येत असल्याची भावना स्थानिकांनी व्यक्त केली आहे.
या प्रकरणातील आरोपींना तात्काळ अटक करून कठोर कारवाई करावी, अशी जोरदार मागणी स्थानिक नागरिकांकडून होत आहे. या घटनेने भंडारा जिल्ह्यात एकच खळबळ उडाली असून, पुढील तपासाकडे सर्वांचे लक्ष लागले आहे.