दुबईकडे जाणारी एअर इंडियाची सर्व उड्डाणे तात्पुरती रद्द

नवी दिल्ली : पश्‍चिम आशियात वाढलेल्या तणावाच्या पार्श्‍वभूमीवर एअर इंडियाने दुबईकडे जाणारी आपली सर्व उड्डाणे सोमवारी तात्पुरती रद्द करण्याचा निर्णय घेतला आहे. दुबईतील विमानतळावरील अचानक उद्भवलेल्या परिस्थितीमुळे ही सेवा थांबवण्यात आली असल्याची माहिती कंपनीने दिली.
कंपनीच्या माहितीनुसार, दुबई विमानतळावर येणारी व तेथून जाणारी विमानसेवा काही काळासाठी स्थगित करण्यात आल्याने एअर इंडियाची दुबईकडे जाणारी तसेच तेथून भारतात येणारी सर्व उड्डाणे रद्द करण्यात आली. मात्र, एअर इंडिया एक्सप्रेसची अबू धाबी, रास अल खैमाह आणि शारजाहकडे जाणारी नियोजित उड्डाणे पूर्ववत सुरू असल्याचे स्पष्ट करण्यात आले आहे. दरम्यान, तिरुवनंतपुरम येथून दुबईकडे निघालेले एका परदेशी विमान कंपनीचे प्रवासी विमान सुरक्षेच्या कारणास्तव मधेच परत फिरावे लागले. संबंधित विमान पहाटे सुमारे चार वाजून चाळीस मिनिटांनी रवाना झाले होते; मात्र गंतव्य विमानतळावर सुरक्षेशी संबंधित घटना घडल्याची माहिती मिळाल्यानंतर ते पुन्हा तिरुवनंतपुरम विमानतळावर सुरक्षित उतरवण्यात आले. या विमानात 353 प्रवासी आणि 19 कर्मचारी होते. अशीच घटना कोची विमानतळावरून दुबईकडे निघालेल्या दुसर्‍या विमानाबाबतही घडली. दुबई विमानतळ अचानक बंद करण्यात आल्याने ते विमानही मधल्या मार्गातून परत फिरून कोची येथे उतरवण्यात आले. मिळालेल्या माहितीनुसार, दुबई आंतरराष्ट्रीय विमानतळ परिसरात मानवरहित यंत्राशी संबंधित घटनेनंतर आग लागल्याची शक्यता व्यक्त करण्यात येत आहे. या घटनेनंतर सुरक्षेच्या कारणास्तव विमानतळ परिसरातील काही रस्ते तात्पुरते बंद करण्यात आले आहेत. दुबई पोलिसांनी विमानतळ मार्ग आणि बोगदा मार्ग सध्या वाहतुकीसाठी बंद असल्याचे जाहीर केले असून वाहनचालकांनी पर्यायी मार्गांचा वापर करावा, असे आवाहन करण्यात आले आहे. घटनास्थळी आपत्कालीन मदत आणि बचावकार्य सुरू असून परिसरातील वाहतूक वळविण्यात आली आहे. दरम्यान, परिस्थिती नियंत्रणात आल्यानंतर विमानसेवा पुन्हा सुरू करण्याबाबत निर्णय घेतला जाईल, असे संबंधित अधिकार्‍यांनी सांगितले.