’अनलॉक’नंतर बाजारात पसरले नवचैतन्य

पुणे/प्रतिनिधी : जवळपास दीड-दोन महिन्यांच्या खंडानंतर दुकाने ’अनलॉक’ झाली आणि शहरातील बाजारपेठांमध्ये नवचैतन्य पसरले. दुकानांची स्वच्छता, पूजन करून व्यावसायिकांनी ’पुनश्‍च हरिओम’ केला. खरेदीसाठी निर्धारित वेळ उपलब्ध असल्याने पुणेकरांनी एकच गर्दी केल्याचे चित्र दिसून आले. 

    लक्ष्मी रस्त्यावरील अनेक दुकानांमध्ये सॅनिटायझर, थर्मल गनची व्यवस्था करण्यात आली होती. अनेक दुकानांबाहेर रांगोळ्या काढण्यात आल्या होत्या. त्याचबरोबर बहुतांश ठिकाणी ग्राहकही रांगेत थांबून सुरक्षित अंतराचा निकष पाळत असल्याचे दिसून आले. काही व्यावसायिकांनी पेढे, गुलाबपुष्प देऊन ग्राहकांचे स्वागत केले. दोन महिन्यांपासून खरेदी करता न आल्याने सकाळपासूनच पुणेकरांनीही खरेदीसाठी बाजारपेठांमध्ये धाव घेतली. कपडे, पादत्राणे, कटलरी, बल्ब-ट्युबसारख्या इलेक्ट्रिकल वस्तूंची खरेदी, इस्त्री-गिझर-मिक्सर सारख्या उपकरणांची दुरुस्ती त्याचबरोबर मोबाइल फोनसह, कम्प्युटर, लॅपटॉपची खरेदी-दुरुस्तीसाठी येणार्‍या ग्राहकांची संख्या मोठी होती. शहरात सध्या दररोज हजेरी लावणार्‍या पावसामुळे छत्री, रेनकोट आणि पावसाळी साहित्यालाही मागणी होती. टाळेबंदीच्या काळात सराफांच्या दुकानातच अडकून पडलेले दागिने ताब्यात घेण्यासाठी सराफा दालनातही लगबग दिसून आली. सलून आणि ब्युटी पार्लरला परवानगी दिलेली नसतानाही शहराच्या गल्लीबोळापासून ते मुख्य रस्त्यांवरही ते सुरू असल्याचे दिसून आले. त्यामुळे सलूनबाहेर नागरिक प्रतीक्षेत असल्याचे चित्र होते. मध्यवर्ती भागांप्रमाणेच शहराच्या सर्वच उपनगरांमध्येही दुकाने उघडण्यात आली. त्यामुळे या भागातील बाजारपेठांमध्ये,दुकानांमध्ये ग्राहकांची गर्दी दिसून आली.

तुळशीबाग सजली

’लसीकरण करून घेऊन, बाजारपेठ आणि देश सुरक्षित ठेवू,’ असा संदेश रांगोळीच्या माध्यमातून देऊन तुळशीबाग व्यापारी असोसिएशनतर्फे ग्राहकांचे स्वागत करण्यात आले. स्थायी समितीचे अध्यक्ष हेमंत रासने यांचा प्रातिनिधिक सन्मान करण्यात आला. ग्राहकांना कोरोनासंदर्भातील सर्व नियम पाळण्याचे आवाहन केले गेले. असोसिएशनचे अध्यक्ष नितीन पंडित आणि पदाधिकारी उपस्थित होते.